Braziliya çempionatının 7-ci turu “Botafoqo” üçün ikiqat uğurlu alındı.

"Football-plus.az" xəbər verir ki, A seriyasının lideri vacib qələbə qazanmaqla mövqeyini möhkəmləndirdi.

Əvvəlki turun “Qoyas”la səfər oyununda ilk məğlubiyyətini alan Rio de Janeyro klubunun 5 matçlıq qələbə seriyası qırılmış, ancaq bu nəticə “Botafoqo”nun zirvədəki mövqeyini dəyişməmişdi. Luiş Kaştronun çalışdırdığı komandanın “Fluminense” ilə görüşünü turun mərkəzi oyunu adlandırmaq olardı. Son mövsümün bürünc mükafatçısı olan “Flu” tura liderdən 2 xal geri qalmaqla 3-cü yerdə başlamışdı.

“Nilton Santos” stadionundakı matçda ev sahibləri topa sahibolmada rəqibdən geri qaldılar (41-59 faiz). Buna baxmayaraq, “Botafoqo”nun qapıya zərbələr planında böyük üstünlüyü vardı: 20-2. Qapıya 7 dəqiq zərbə endirən rio de janeyrolular uzun müddət Fabio səddini keçə bilmədi. 42 yaşlı qapıçısı qonaq komandanı 6 dəfə qoldan xilas etdi. Lakin o, 74-cü dəqiqədə Kuestanın zərbəsi qarşısında aciz qaldı. Argentinalı mərkəz müdafiəçisinin Tikinyo Soaresin ötürməsi ilə vurduğu qol “Botafoqo”nun qələbəsi üçün kifayət etdi. Fernando Dinizin çalışdırdığı “Fluminense” məğlub olsa da, topların daha yaxşı fərqinə əsasən 3-cü yerdə qaldı.

Liderin əsas izləyicisi “Palmeyras” hesabına bir xal yaza bildi. 2022-ci il mövsümünün çempionu “Santos”a qarşı səfər oyununda qapıya yalnız bir dəqiq zərbə endirə bildi ki, həmin epizodda qapıçı qola imkan vermədi. Abel Ferreyranın komandası San Pauluya xalla qayıtmasına görə 4 dəfə seyv edən Uevertona minnətdar olmalıdı. Matç 35 yaşlı qapıçının sayəsində başladığı hesabla sona çatdı. İki xal itkisi “Palmeyras”ı əsas izləyicisi kimi qaldığı liderdən 3 xal geri saldı.

Ötən mövsümün vitse-çempionu dərin böhran yaşayır. “İnternasyonal” əzəli rəqibi “Qremio”ya 1:3 hesabı ilə uduzdu. Ardıcıl 4-cü məğlubiyyət Manu Menezeşin komandasını 12-ci yerdən 15-ə saldı.

“Atletiko Mineyro” isə yüksəlişdədi. Argentinalı Eduardo Kudetin çalışdırdığı komanda “Koritiba”ya səfərdə qalib gəldi - 2:1. Ardıcıl 3-cü qələbə belu orizonteliləri 6-cı yerdən 4-ə yüksəltdi.

“Flamenqo” 3 oyunluq məğlubiyyət seriyasını növbəti uğurlu nəticə ilə müşayiət etdirdi. “Korintians”ı bir qolla üstələyən Xorxe Sampaolinin komandası üçpilləlik sıçrayışla 6-cı yerə çıxdı.

7-ci tur
Botafoqo RJ - Fluminense 1:0
Kuesta, 74.

Santos - Palmeyras 0:0

Kruzeyro – Kuyaba 0:1
Deyverson, 37.

Braqantino - Atletiko Paranaense 2:0
Eduardo Saşa, 16. Borbas, 86.

Qremio - İnternasyonal 3:1
L.Suares, 7. Vilyasanti, 31. Bitello, 65 – Kardoso, 87.

Bayya - Qoyas 1:1
Everaldo, 25 – Bruno Melo, 31.

San Paulu - Vasku da Qama 4:2
Kalyeri, 24. Rodriqo Nestor, 42. Beraldo, 89. Juan, 90+2 – Kauan Barros, 45. Qalarsa, 83.

Koritiba - Atletiko Mineyro 1:2
Robson, 13-p. - Yoran, 37. Halk, 90+1-p.

Flamenqo - Korintians 1:0
Leo Pereyra, 90+4.

Amerika Mineyro - Fortaleza 2:1
Breno Kaskardo, 2. Felipe Azevedo, 33 – Poçettino, 26.

1. Botafoqo RJ 7 6 0 1 14-6 18
2. Palmeyras 7 4 3 0 16-6 15
3. Fluminense 7 4 1 2 12-6 13
4. Atletiko Mineyro 7 4 1 2 11-6 13
5. Kruzeyro 7 4 0 3 11-6 12
6. Flamenqo 7 4 0 3 13-9 12
7. Atletiko Paranaense 7 4 0 3 10-9 12
8. San Paulu 7 3 3 1 12-6 12
9. Santos 7 3 2 2 8-5 11
10. Qremio 7 3 2 2 10-10 11
11. Fortaleza 7 2 4 1 10-6 10
12. Braqantino 7 2 4 1 11-11 10
13. Bayya 7 2 1 4 9-12 7
14. Kuyaba 7 2 1 4 6-12 7
15. İnternasyonal 7 2 1 4 5-11 7
16. Qoyas 7 2 1 4 6-13 7
17. Vasku da Qama 7 1 3 3 8-11 6
18. Korintians 7 1 2 4 6-12 5
19. Amerika Mineyro 7 1 1 5 7-18 4
20. Koritiba 7 0 2 5 6-16 2

Bombardirlər: Tikinyo Soares (Botafoqo RJ) - 6, Rafael Veyqa (Palmeyras), Halk (Atletiko Mineyro) - 4.