Ağdamlılar srağagün Çempionlar Liqasının 2023/24 mövsümündə ilk oyununa çıxdı.

Qurban Qurbanovun meydana buraxdığı heyət o qədər də təəccüb doğurmadı. Sadəcə, Nərimanın ilk “11-lik”də yer alması süpriz idi. Lakin gənc futbolçunun yoxlama görüşlərində özünü yaxşı tərəfdən göstərməsi mütəxəssisin diqqətini çəkmişdi. Rəqibin də münasib olduğunu nəzərə alsaq, Nərimanın Çempionlar Liqasında debüt etməsi normal hal idi.

Görüş başlayan kimi hiss olundu ki, Cəbəllütariq klubu asan təslim olmayacaq. “Linkoln Red İmps” daha çox əks-hücumlara bel bağlayırdı. Ağdamlılar isə alışdığımız oyunu sərgiləməyə çalışırdı. Onlar topu özündə saxlayaraq mərkəzdən ötürmələrlə müdafiəni yarmaq istəyirdi. Lakin rəqib yaxşı müdafiə olunaraq buna mane ola bilirdi. Buna baxmayaraq, ilk təhlükəli vəziyyəti ağdamlılar yaratdı. Təmsilçimiz rəqibi əks-hücumda yaxaladı. Andrade uzun reydini Nərimana ötürmə ilə tamamladı. Gənc futbolçu bir oyunçunu geridə qoyub, qapıya zərbə vursa da, son anda müdafiəçi bunun qarşısını ala bildi. “Linkoln Red İmps” 19-cu dəqiqədə “Qarabağ”ın qapısı önündə təhlükə yaratdı. Kike künc nöqtəsindən ötürülən topa son anda toxuna bilmədi. Belə məqamlardan sonra ev sahibi komanda daha da ümidlə irəli atılırdı. Bu da onların işinə yaradı. 25-ci dəqiqədə Ayunun uzun ötürməsini ələ keçirən Kike Medinanı yerə sərib, Bəhlulu aldadıb, Şahruddini məyus etdi. Qol “Qarabağ” üçün şok effekti yaratmadı. Sanki futbolçular buna hazır idi. Qəflət yuxusundan ayılan ağdamlılar 33-cü dəqiqədə qola yaxın oldu. Zubirin ötürməsini qəbul edən Nəriman bir rəqibini aldadaraq qapıya zərbə endirdi. Lakin top tirə tuş gəldi. Qonaqlar ilk hissənin sonuna kimi nə qədər çalışsa da, rəqibin müdafiəsini yara bilmədi. Hətta 45-ci dəqiqədə “qırmızı-ağlar” ikinci qolu vura bilərdi. Qapı qarşısına uzun ötürmədən sonra Şahruddin çıxışda səhvə yol verdi. Yaxşı ki, Britto bunu gözləmədiyindən topa zərbə vura bilmədi.

Komanda geridə olsa da, Qurban Qurbanov 2-ci hissəyə də eyni heyətlə başladı. Lakin fasilədən sonra, demək olar ki, ağdamlılar bütün oyunu hücumda keçirdi. Bu da rəqibə sərf edirdi. Xavi Munyosun komandası tez-tez əks-hücumlar quraraq “köhlən atlar”ın müdafiəsini yara bilirdi. Sadəcə, sonda dəqiq zərbə vura bilmirdilər. Əvəzində daha istəkli oynayan “Qarabağ” 58-ci dəqiqədə hesabı bərabərləşdirdi. Ayunun səhvindən sonra Zubir topu ələ keçirdi. Cica onun ötürməsini dəqiq zərbə ilə tamamladı. Bundan sonra isə tərəflər açıq futbola üstünlük verdi. Amma müəyyən məqamlarda meydan sahiblərinin təcrübəsizliyi aşkar hiss olunurdu. “Qarabağ”ın isə cəhdləri alınmırdı. Andrade ardıcıl iki epizodda qola yaxınlaşsa da, sonda dəqiq zərbə vura bilmədi. 88-ci dəqiqədə Benzyanın küncdən göndərdiyi topu Bəhlul başla çölə vurdu. Qurban Qurbanovun komandası, nəhayət, sonda istəyinə çatdı. 90+4-cü dəqiqədə Qaranın ideal ötürməsini Benzya dəqiq zərbə ilə qapıya göndərdi. Fransalı futbolçunun Ağdam klubundakı ilk qolu komandasına vacib qələbə qazandırdı.

Gözdən qaçmadı
* Görüşü üç-dörd azərbaycanlı azarkeş stadiondan canlı izləyirdi.
* Qarşılaşmanın ən maraqlı məqamlarından biri Benzyanın fanatı olan, “Qarabağ”ın formasını geyinən 3 şəxsin “köhlən atlar”ı dəstəkləməsi idi.

İLKİN SULTANLI