Çempionlar Liqasının 2023/24 mövsümün 1-ci təsnifat mərhələsində “Qarabağ”ın rəqibi “Linkoln Red İmps” klubu olacaq.

“Qırmızı-ağlar”ın əsası Çarlz Polson və Çarlz Hed tərəfindən 1976-cı ildə qoyulub. Komanda “Köhnə polislər” adlanan gənclər təşkilatının işçilərindən və “Qlakis Yunayted”lə “St. Jaqo”nun buraxılan futbolçularından formalaşdırıldı. Əvvəlcə “Mavi dəyənəklər” adlanırdı. Daha sonra Çarlz Polsonun dostu olan Linkoln sakini və “Şeffild Yunayted”in sədri Req Brealinin şərəfinə “Linkoln Red İmps” adlandırıldı. “İmps” “Linkoln İmp” əfsanəsinin şərəfinə klubun ləqəbi kimi götürülüb.

Komanda ev oyunlarını 8 min yerlik“Viktoria” stadionunda keçirilir. Əslində arena əvvəllər 5 min nəfərlik imiş. Lakin 2011-ci ildə təmir olunaraq tutumu 8 minə çatdırılıb. Arena “Uinston Çörçill” prospektində yerləşir. Burda daha çox ingilis əhali yaşayır.

“Linkoln Red İmps” 2003-16 illər aralığında ardıcıl 14 dəfə Cəbəllütariq çempionu olaraq qırılması çətin görünən rekorda imza atıb. “Qırmızı-ağlar” bununla da 1960-cı illərdə “Qlakis Yunayted”in əldə etdiyi nəticəni daha da yaxşılaşdırmış oldu. “Linkoln Red İmps” öz ölkəsində 6 dəfə trebl edən– mövsüm ərzində 3 titulun hamısını qazanan yeganə komandadı.

“Transfermarkt”a görə Cəbəllütariq təmsilçisinin büdcəsi 1,88 milyon avrodu. Çempion olan heyətdə 23 futbolçu yer alıb. Bunlardan 11-i milli komandanın üzvüdü. 9 oyunçu isə legionerdi. Əcnəbi futbolçular əsasən ispanlardı. Komandanın ən məhsuldar oyunçusu mərkəz hücumçusu Kike Qomesdi. O, 2022/23 mövsümündə rəqibləri 11 dəfə məyus edib. Bundan başqa, 5 qolun vurulmasına da şərait yaradıb. İkinci sırada isə Xuanfri qərarlaşıb. İspaniyalı forvard mövsüm ərzində 10 qol vurub, 5 məhsuldar ötürmə verib.

İLKİN SULTANLI