“Qarabağ” bu gün 2023/24 mövsümündə ilk rəsmi oyununa çıxır. Ağdam təmsilçisi Çempionlar Liqasının 1-ci təsnifat mərhələsində səfərdə “Linkoln Red İmps”lə qarşılaşacaq.

Açıq deyə bilərəm ki, “köhlən atlar” bu qarşılaşmanın favoritidi. Düzdü, “Qarabağ”ın əleyhinə olan məqamlar da var. Məsələn, görüşün keçiriləcəyi “Viktoriya” stadionunun örtüyü sünidi. Bu məqam ağdamlılara mane ola bilər. Hər halda, bu mövsüm ilk rəsmi görüşün təbii örtükdə baş tutması daha münasib olardı. Çünki futbolçuların burda performanslarını tam şəkildə göstərə bilməmək ehtimalı var. Bundan əlavə, hansısa oyunçu zədələnə bilər.

İkinci məqam isə “Qarabağ”ın rəqibi yaxından tanıya bilməməsidi. Bu məsələ olduqca vacibdi. Uzun illərdi Qurban Qurbanov “Qarabağ”a rəhbərlik edir. Təcrübəli mütəxəssis ilk dəfədi ki, “rəqibi yaxından tanıya bilmədik”, - deyə açıqlama verir. Buna görə narahat olmağa dəyər? Məncə, yox. Çünki Qurban Qurbanov böyükhesablı qələbə qazanandan sonra belə “rəqib yaxşı mübarizə apardı” deyən, həmişə oyunlardan öncə ehtiyatlı danışmağı xoşlayan personadı.

Ola bilər ki, Cəbəllütariq klubu haqda çox informasiya əldə edə bilməsin. Bu da normaldı. Çünki bu ölkənin çempionatı reytinq baxımından Avropanın “zirzəmi”sində yer alır. Bu liqada çıxış edən kollektiv haqda az informasiyanın əldə edilməsində təəccüblü heç nə yoxdu.

Son məqam isə oyunun keçiriləcəyi saatla bağlıdı. Qarşılaşma 19.30-da start götürəcək. Cəbəllütariq zaman olaraq Azərbaycandan 2 saat öndədi. Yəni, yerli vaxtla qarşılaşma 17.30-da start götürəcək. Lakin bu məqamın “Qarabağ”a təsir edəcəyini düşünmürəm. Onsuz da “köhlən atlar” premyer-liqada saat 15.00, 16.00-da oynamağa alışıb. 2022/23 mövsümündə Tovuz, Gəncə, Şamaxı və Qəbələdə qarşılaşmalar günorta keçirilib.

Əlbəttə, sadaladığım məqamlar olmasaydı, daha yaxşı olardı. Lakin “Qarabağ”ın avrokuboklar təcrübəsi “Linkoln Red İmps”dən daha çoxdu. Qurban Qurbanovun sərəncamında olan futbolçular Cəbəllütariq təmsilçisinin heyətindəkilərdən peşəkarlıq və ustalıq baxımından qat-qat üstündü. Narahat olmağa dəyməz. Saat 19.30-da özünüz üçün gözəl şərait qurun. İstər dostlarınızla, istərsə də tək ekran başında əyləşərək Azərbaycan təmsilçisinin gözəl oyunundan zövq alın. “Linkoln Red İmps”i gözünüzdə böyütməyin!

İLKİN SULTANLI