Bazar ertəsi mövsümün sonuncudan əvvəlki “Böyük dəbilqə” turniri start götürdü. Dünyanın ən güclü kişi və qadın tennisçiləri iki həftə ərzində “Uimbldon”u fəth etməyə çalışacaq. Bəs İngiltərənin ot örtüklü kortlarında keçiriləcək turnirin favoritləri kimdi?


"Football-plus.az" xəbər verir ki, zədəli Rafael Nadalın yoxluğunda, təbii ki, əsas favorit Novak Cokovicdi. Son qalib yaşına uyğun olmayan şəkildə yenə də qələbə acıdı. Ümumiyyətlə, 36 yaşlı serbin uğur formulunu, rəqiblərini bir-birinin ardınca necə sıradan çıxarıb bütün əsas mükafatları silib-süpürməsunun səbəbini anlamaq çətindi. Bir məqam dəqiqdi ki, bu turnirdə də onun yolu üzərinə çıxan rəqibin işi çətin olacaq. Rusların əsas qələbə ümidi Daniil Medvedev uğurları sıralasa, finalda Cokoviçə rəqib ola bilər. Amma unutmayaq ki, Daniilin 1/4 finalda Stefanos Sisipasla qarşılaşması mümkündü. Yunan tennisçi rusun qənimlərindən sayılır.

Kişilər arasında mübarizənin favoritlərindən biri də Karlos Alkarasdı. İspaniyalı ulduz Londona reytinqin 1 nömrəsi kimi təşrif buyurub. Ekspertlər onun ot örtükdə qələbə şansını ən azı Cokoviçin şansı qədər yüksək sayırlar. Süni intellekt hətta turnirin torunu araşdırandan sonra belə qənaətə gəlib ki, kişilər arasında ən asan yol Alkarasın bəxtinə düşüb. Üstəlik Karlitos yaxınlarda məhz Londonda – ot örtükdə keçirilən ATP 500 turnirində də qalib gəlib.
Qadınlar arasında mübarizəyə gəlincə, artıq yeni “böyük üçlük” yaranıb. Söhbət ötənilki qalib Yelena Rıbakinadan, İqa Sventekdən və Arina Sobolenkodan gedir. Bunların sırasına Ons Jaberi də qoşmaq olar. Rıbakina ötən həftə İstburn turnirindən çəkildi ki, Londonda özünü daha parlaq göstərə bilsin. Qazaxıstan təmsilçisi hələ “Rolan Qarros”da virusa yoluxmuşdu. Və onu da etiraf edir ki, xəstəlik üzündən "Uimbldon" turnirinə istədiyi səviyyədə hazırlaşa bilməyib. Süni intellekt qadınların turnirində də mübarizə yolunu araşdırıb. Dünyanın 1 nömrəli qadın raketkası Sventeki qələbəyə aparan yol daha asan görünür.

Maraqlı faktlar...
* İlk mərhələdə Pedro Kaçini məğlub edən Cokoviç “Uimbldon”da ardıcıl 29-cu qələbəsini qazandı. O, bu turnirdə sonuncu dəfə 2017-ci ildə uduzub. Açıq era dövründə “Uimbldon”da yalnız üç tennisçinin daha uzun məğlubiyyətsiz oyunlar seriyası olub: Pit Sampras (31), Rocer Federer (40), Byorn Borq (41).
* İlk mərhələnin ən sensasiyalı nəticələrindən biri bu turnirin reyntinqinə görə 11-ci tennisçisi, kanadalı Feliks Oje-Alyassimin ATP reytinqində 119-cu yerdə qərarlaşan Maykl Mmoya uduzması oldu. Bu görüş 4 saat 2 dəqiqə davam etdi.
* Alkaras tarixdə ilk dəfə qarşılaşdığı Jeremi Şardinin beynəlxalq karyerasına son qoydu. Bu, 38 yaşlı fransalının karyerasında sonuncu beynəlxalq turnir idi. Estoniyalı Anett Kontaveyt də karyerasında sonuncu dəfə beynəlxalq arenada görünür. O, uzunmüddətli zədələr üzündən karyerasını bitirməyə qərar verib. Düzdü, 27 yaşlı Kontaveyt Şardidən fərqli ilk oyunda Lukretsiya Stefaniniyə qalib gəldi.