Nyu-Yorkda ilin “Böyük dəbilqə” seriyalı son turnirinin püşkü atılıb və tennisçilər, eləcə də bu idman növünə könül verənlər səbirsizliklə startı gözləyir.

Xatırladaq ki, builki “Böyük dəbilqə” turnirlərindən yalnız “Rolan Qarros”a bütün güclülər qatıla bilib. “Australian Open”ə Novak Cokoviç, “Uimbldon”a isə ruslarla belaruslular buraxılmayıb. Bazar ertəsi start götürəcək “US Open”də nə Cokoviç olacaq, nə də dünyanın ikinci raketkası Aleksandr Zverev.

Zverevin “Rolan Qarros”un yarımfinalında topuğunu zədələdiyini, məhz bu üzdən kənarda qalacağını xəbər vermişdik. “US Open”ə qatılmamaq Almaniya təmsilçisi üçün 720 xal itirmək deməkdi. Zverev ötənilki turnirdə yarımfinala qədər irəliləmiş, burda isə Cokoviçə uduzmuşdu. Serb ulduzun yoxluğunun da səbəbi aydındı. O, koronavirusa görə peyvənd olunmadığından Kanada və ya Amerika sərhədini keçə bilməz. Hələ iyunda təşkilatçılar izah etmişdilər ki, Cokoviçin problemi turnirə buraxılmamaq yox, sərhədi keçə bilməməkdi. Yəni təşkilatçılar bu məsələnin həllini boynuna götürməmişdi. İki həftə əvvəl ABŞ-da koronavirus reqlamentinin yumşaldılacağı ilə bağlı ümidlər yaransa da, bu da əcnəbilərə aid edilmədi. Əcnəbilər hələ də tam peyvənd olmağa məcburdu.

Təşkilatçılar “US Open”in üçqat qalibini turnirin rəsmi posterində göstərməyib. Posterdə Daniil Medvedev, Rafael Nadal, Karlos Alkaras, Nik Kiryos, Serena Uilyams, Emma Radukanu, İqa Sventek və Naomi Osaka yer alıb. Yeri gəlmişkən, “US Open”də Rayli Opelka da olmayacaq. Dünyanın 28-ci raketkası çiyin zədəsindən əziyyət çəkir. Turnirin əsas torunda onu dünyanın 108-ci tennisçisi Cek Sok əvəz edəcək.

Cokoviçlə Zverevin yoxluğunda bukmekerlərin əsas favoritləri Daniil Medvedev, Karlos Alkaras, Rafael Nadal, Stefanos Sisipas, Yannik Sinner, Feliks Oje-Alyassim, Matteo Berrettini, Teylor Frits və Nik Kiryosdu. Sonuncu hazırda reytinqin 26-cı pilləsində qərarlaşsa da, son vaxtlar istənilən rəqibi məğlub etməyə qadirdi. O, Londonda Sisipasa qalib gəldi, ardından Vaşinqton turnirini qazandı, Medvedevi məğlub etdi. Kiryos özü Alkarası favorit sayır. 19 yaşlı ispan “US Open”i qazanacağı təqdirdə dünyanın 1 nömrəli tennisçisi ola bilər. Nadalın da belə imkanı var. Bunun üçün ona yalnız qələbə qazandı. Favoritlərdən Medvedevin finala qədər Nadal və Alkaras ilə yolu kəsişməyəcək. Rusiyalı tennisçi irəliləyəcəyi halda güclü rəqib kimi Sisipasla qarşılaşacaq.

Qadınların yarışı ilə bağlı həlledici sual budu ki, Radukanu titulunu qoruya biləcəkmi? Son çempion mövsümboyu o qədər parlaq təsir bağışlamasa da, Amerika kortlarında onun ikinci nəfəsi açılır. İkinci önəmli məqam Serena Uilyamsın bu turnirdən sonra karyerasını bitirib-bitirməyəcəyidi. Yüzdə 99 faiz ehtimal bitirəcəyi yönündədi, sadəcə, maraq doğuran məqam tennisdən növbəti titulla, yoxsa titulsuz gedəcəyidi. Təəssüf ki, Uilyams bacılarından kiçiyi heç də ən yaxşı formada deyil, üstəlik püşk də onun üzünə gülməyib. Serena ilk mərhələdə monteneqrolu Koviniçi keçsə belə, ikincidə eston Anett Kontaveytlə üzləşə bilər. Karyerasının zirvəsində olmayan Serenanın dünyanın 2-ci raketkasını keçməsi çətin olacaq.
Dünyanın 1 nömrəli qadın tennisçisi İqa Sventek isə indiyə qədər bir dəfə də “US Open”də 1/8 finaldan uzağa gedə bilməyib. Polşalı tennisçi məhz bu il boşluğu aradan qaldırmağa çox yaxındı.