İyulun 2-dən etibarən yeni mövsümə hazırlıq dönəminə start verən “Beşiktaş”la bağlı xəbərlər var. Öncə qeyd edək ki, bu yaxınlarda karyerasını başa vuran Burak Yılmaz “Qartal”ın məşqçilər korpusuna daxil olub. Futbolçu kimi İstanbul nəhəngində iki fərqli dönəmdə forma geymiş Burak qarşıdakı mövsümdə Şenol Günəşin köməkçilərindən biri olacaq.

"Football-plus.az" xəbər verir ki, ötən mövsüm icarə əsasında “ağ-qaralar”ın şərəfini qoruyan Tayfur Bingöl müqavilə ilə məxsus olduğu “Alanyaspor”a qayıdıb.

30 yaşlı sağ cinah müdafiəçisi ötən mövsüm 34 rəsmi oyunda komandaya 2 qol, 2 məhsuldar ötürməlik fayda vermişdi. Hazırda heyətdə olan bəzi futbolçuların hələ də komandanı tərk etmək ehtimalı var. Söhbət ilk növbədə Romeyn Saiss ilə Jedson Fernandeşdən gedir. Amma rəhbərlik İtaliya klublarının hədəfində olan Fernandeşi qətiyyən buraxmaq istəmir. Saissa “Marsel” maraq göstərsə də, fransızların 2,5 milyon avroluq təklifi geri çevrilib. Təcrübəli mərakeşli müdafiəçiyə “Əl-İttihad” da maraq göstərir. “Beşiktaş” bu satışdan ən azı 4 milyon avro qazanmaq istəyir. “Sauthempton”dan birilliyə icarəyə götürülən və icarə müddəti başa çatan Redmond isə hələ də gələcəyi ilə bağlı qərarını verməyib. Günəş onun komandada qalmasını istəyir. İdman direktoru Ceyhun Kazancı danışıqlar üçün İngiltərəyə yollanıb. “Beşiktaş” 29 yaşlı futbolçuya illik 1,6 milyon avro maaş və “2+1” illik müqavilə təklif edib. Futbolçu yenicə ata olduğu üçün ailəsi ilə birlikdə vətənində yaşamağa üstünlük verir. Redmondun həftəsonuna qədər qərarını verəcəyi gözlənilir. Onu da bildirək ki, aprelin əvvəllərində “Fənərbaxça” ilə derbidə diz bağları qopan Tayyip Talha Sanuç hələ də məşqlərə başlamayıb. O, hazırlıq dönəmində komanda ilə olmayacaq. 23 yaşlı futbolçunun yalnız yeni mövsümün 8-ci turundan etibarən oyunlara çıxa biləcəyi gözlənilir.

Bu arada “ağ-qaralar” Günəşin istəyi ilə heyəti bir gənc oyunçu ilə gücləndirib. Söhbət Əmrəcan Bulutdan gedir. 20 yaşlı vingerlə “4+1” illik müqavilə imzalanıb. Bu futbolçunun nəinki superliqa, heç 1-ci liqa təcrübəsi də yoxdu. Əsasən aşağı liqalarda top qovan Əmrəcan ötən mövsümü 3-cü divizion təmsilçisi “Somaspor”da keçirmiş və 34 rəsmi oyunda 16 qol, 1 məhsuldar ötürmə ilə fərqlənmişdi.