Burak Yılmazın Fransa karyerası mövsümün sonunda rəsmən başa çatacaq.

Bu xəbəri məşhur forvard özü fanatlarına çatdırıb. “Lill”in bu gün “Renn”ə qarşı keçirəcəyi oyun Burak Yılmazın Fransadakı son qarşılaşması olacaq. Təcrübəli futbolçu dünən sosial şəbəkədə komandası ilə bu sözlərlə vidalaşıb:

“Sabah “Lill”də son oyunumu keçirəcəm. Bu iki il çox gözəl keçdi və iki mükəmməl titul qazandıq. Hər şey üçün təşəkkür edirəm. Sizləri unutmayacam”.

Xatırladaq ki, Burak Fransaya 2020-ci ildə “Beşiktaş”dan ayrılandan sonra yollanmışdı. 35 yaşında ilk dəfə Avropaya və üstəlik “böyuk beşlik” ölkəsinə yollanan Yılmaz yeni macərasında əsl tarix yazdı. Onun 2020/21 mövsümündəki qəhrəmanlığı və “Lill”i çempionluğa daşıması hələ uzun illər xatırlanacaq. Bu mövsümün əvvəlində Burak bu komanda ilə həm də ölkə superkubokunun qalibi oldu. Türkiyəli hücumçu ümumilikdə “Lill”in heyətində bu günə qədər forma geydiyi 72 rəsmi oyunda 25 qol, 10 məhsuldar ötürməlik uğurlu performans sərgiləyib. Onun sonrakı klubu isə hələ ki bəlli deyil. Azad agent statusuna yiyələnəcəyi üçün istədiyi klubla danışıq aparmaq hüququna malik olan Yılmazın “Beşiktaş”a keçmək ehtimalı daha yüksək görünür. Türkiyə mətbuatının yazdığına inansaq, bu futbolçu karyerasını məhz “Qartal”da bitirmək istəyir. Amma Buraka superliqanın digər təmsilçisi “Adana Dəmirspor” da ciddi maraq göstərir.