''Beşiktaş'' və Türkiyə yığmasının sol cinah müdafiəçisi Rıdvan Yılmazın yeni klubunun adına aydınlıq gəlib.

21 yaşlı istedadlı futbolçu ''Torino'' və ''Ayntraxt''ın hədəfində idi. Türkiyə mətbuatının yazdığına inansaq, bu mübarizədən almanlar qalib ayrılıb. Başqan Ahmet Nur Çəbi AL-in son qalibinin 6,5 milyon avroluq təklifini qəbul edib. Bundan başqa Rıdvanın sonrakı satışından əldə olunacaq pulun 20 faizi də ''Beşiktaş''a çatacaq. Solaxay futbolçu çərşənbə axşamı Frankfurta yollanaraq tibbi müayinədən keçdikdən sonra rəsmi müqaviləyə imza atacaq. Onun yeni klubu ilə beşillik müqavilə imzalayacağı və illik məvacibinin təxminən 1 milyon avro olacağı gözlənilir. Qeyd edək ki, Rıdvan Yılmaz ''Beşiktaş''ın öz yetirməsidi. O əsasən Sərgən Yalçının dönəmində şans qazanmağa başladı və 2020/21-də çempionluğu qazanan komandanın önəmli parçalarından biri oldu. Rıdvan indiyə qədər ''Qartal''da 60 rəsmi oyuna çıxaraq 4 qol, 7 məhsuldar ötürmə ilə yadda qalıb. Yığmada isə 6 oyunda forma geyib. Onu da bildirək ki, son mövsümü icarə əsasında ''Neymegen''də keçirən daha bir türkiyəli futbolçu Əli Akman da müqavilə ilə ''Ayntraxt''a məxsusdu.