Rıdvan Yılmaz Şotlandiya macərası haqda danışdı
“Beşiktaş”ın akademiyasında yetişən və ötən yay bonuslarla birlikdə 6,2 milyon avroya “Reyncers”ə transfer olunan Rıdvan Yılmaz tətil üçün gəldiyi vətənində türkiyəli həmkarlarımıza açıqlamalar verib.
"Football-plus.az" xəbər verir ki, 22 yaşlı sol müdafiəçinin Şotlandiyadakı ilk mövsümünü çox da uğurlu adlandırmaq olmaz. Rıdvan yeni klubunda bütün turnirlərdə cəmi 15 oyuna çıxaraq 3 məhsuldar ötürmə ilə yadda qaldı. Qlazqo nəhəngi fırtına kimi əsən əzəli rəqibi “Seltik”in kölgəsində qalaraq mövsümü titulsuz başa vurdu. Sözü verək Rıdvana: “Reyncers”də ilk gündən çox isti qarşılandım. “Reyncers” fanatları yaxşı insanlardı. Dil baxımından müəyyən problemlər yaşasam da, hər kəs əlindən gələn qədər yardım etdi. İlk gündən etibarən seçimimin doğru olması ilə bağlı beynimdə heç bir şübhə qalmadı. Orda tək yaşayıram. Şotlandiyada oyunlardan bir gün öncə bazada toplanmaq ənənəsi yoxdu. Oyun günü də evdə oluruq. Matçlardan 3 saat öncə toplanırıq. Yemək yeyib oyuna gedirik. Azarkeş mədəniyyəti fərqli səviyyədədi. İnanılmaz və fərqli cür sevinirlər. Səs tonları da fərqlidi. Orda futbolçular çox çalışqandı. Açığı, ilk günlərdə fiziki cəhətdən yetərli olmadığımı anladım. Çəkim 62 kq idi. Mənə 65 kq-a qədər kökəlməyi məsləhət gördülər. Xüsusi yeməklərlə yanaşı, trenajor zalına da tez-tez getməyə başladım. İndi çəkim 67 kq-dı. Orda çalışdığın zaman gözə girmirsən. Çalışmadıqda gözə girirsən. Çünki hər kəs çalışır. Yeni gələn oyunçularda da istər-istəməz çalışmağa həvəs yaradırlar. Şotlandiya çempionatının həm səviyyə, həm də fiziki göstəricilər baxımından Türkiyə çempionatından bir qədər öndə olduğunu düşünürəm. Orda demək olar, fiziki cəhətdən zəif futbolçu yoxdu. Oyunlar sərt keçir. “Reyncers” böyük klub olduğu üçün rəqiblər bizə qarşı əsasən müdafiə futbolu oynayır. Əslində mövsümə yaxşı başlamışdım. Çempionlar Liqasında “Napoli”yə qarşı səfər oyununda gözəl performans sərgiləmişdim. Ən yaxşı formamda idim. Amma həmin matçın sonlarına yaxın yoruldum və arxa əzələmdə ağrılar hiss etməyə başladım. Qorxduğum başıma gəldi və ciddi zədə aldım. Bir neçə aylığa sıradan çıxdım. “Beşiktaş”ı, təbii ki, izləyirəm. Yerimə transfer edilən Masuaku yaxşı futbolçudu. İngiltərədə oynamış oyunçudu. Səviyyəli futbolçuların “Beşiktaş”a gəlməsi məni də sevindirir. Bu səviyyələrə çata bilmək üçün üzərimdə çox çalışdım. “Beşiktaş”da bütün kubokları qazanaraq ayrıldım. İstanbuldan ayrıldığım gün hava limanına çatana qədər yolda ağladım. Hətta mənim üçün hazırlanan videoları da izləyə bilmədim. Arda Gülərə göz dəyməsin, çox sürətlə inkişaf edir. Mən də hər kəs kimi oyununu bəyənirəm. İnşallah, belə də davam edərək çox yaxşı yerlərə gələcək. Karyeramın bu dönəmində Türkiyəyə qayıtmaq istəmirəm. Bu, indiki hədəflərim arasında yoxdu. Amma “Vodafon Park”ın atmosferi, orda oynamaq üçün darıxmışam. Fanatların “Rıdvan, Rıdvan” təzahüratları, qoldan sonrakı sevincləri üçün çox darıxmışam. İnşallah qismət olsa, karyeramı “Beşiktaş”da bitirəcəm”.
Digər xəbərlər
