Ötən yay “Beşiktaş” tarixində bir ilkə imza atmışdı.

“Football-plus.az” xəbər verir ki, belə ki, İstanbul nəhəngi öz yetirməsi olan birdən-birə üç gənc futbolçunu bir transfer dönəmində xarici klublara satmağa müvəffəq olmuşdu. Amma həmin oyunçuların bu mövsümkü performansına nəzər salsaq, bu satışın onların xeyrinə işlədiyini söyləmək çətindi. Ən birinci ayrılan Rıdvan Yılmaz olmuşdu. 2001-ci il təvəlldüldü sol cinah müdafiəçisi Sərgən Yalçının dönəmində əsas komandada şans qazanmağa başlamışdı. 2020/21, 2021/22 mövsümlərində superliqada 45 oyunda 4 qol, 6 məhsuldar ötürməlik performans sərgiləyən Rıdvan Türkiyə yığmasına da dəvət almağa başlamışdı. Amma istedadlı futbolçu ötən yay 4 milyon avroya transfer olunduğu “Reyncers”də sözün əsl mənasında itib-batdı. Düzdü, Qlazqo nəhəngi özü də zəif mövsüm keçirərək “Seltik”in kölgəsində qaldı və məşqçi dəyişikliyinə getdi. Rıdvan 2022/23-də cəmi 11 rəsmi oyuna çıxaraq hesabına 1 məhsuldar ötürmə yaza bildi. Son iki ayda cəmi 2 oyuna çıxan Rıdvan böyük ehtimalla yayda “Reyncers”dən ayrılacaq. Ötən yay “Beşiktaş”dan ayrılan digər gənc futbolçu Əmirhan İlkhan olmuşdu. Fanatlar onun ayrılmasını istəmirdi. 2004-cü il təvəllüdlü vinger oyunu ilə böyük gələcək vəd edirdi. Amma Əmirhan doğma klubuna 4,5 milyon avro qazandıraraq “Torino”ya yollandı. İtaliyada ilk vaxtlar az-çox oynasa da, sonradan gözdən düşdü və üstəlik zədələndi. 4 qarşılaşmada cəmi 87 dəqiqə oynayan futbolçu qışda icarə əsasında “Sampdoriya”ya keçdi. Burda da gözləniləni verə bilmədi və 5 matçda yalnız 65 dəqiqə forma geydi. Üstəlik genuyalılar B seriyasına yuvarlandılar. “Beşiktaş”dan qalmaqallı şəkildə ayrılan və kluba “1,5+1” milyon avro qazandıraraq “Braqa”ya yollanan 2003-cü il təvəllüdlü mərkəz müdafiəçisi Sərdar Saatçının da taleyi fərqli olmadı. İstedadlı futbolçu mövsüm ərzində Portuqaliyada cəmi 5 oyunda 283 dəqiqə oynamaq şansı qazandı. Ümumiyyətlə, 5-6 il önəcki dönəmlə müqayisədə son illərdə xaricə yollanan gənc türkiyəli futbolçuların karyerası o qədər də uğurlu alınmır. 2016-18-ci illərdə Çağlar Söyüncü, Cengiz Ündər, Merih Dəmiral kimi gənclər Avropaya yollanaraq özlərini gösətrməyi bacarmışdılar. Amma son illərdə bunu görmürük.

Yuxarıda adını sadaladığımız “Beşiktaş”lı gənclərdən başqa son dönəmlərdə Ahmetcan Kaplan (Ayaks), Ömər Faruk Bəyaz (Ştutqart), Əli Akman (Ayntraxt F), Doğan Ələmdar (Renn) də Avropaya yollanaraq faktiki it-bat olub. Bu məsələ indi həm Türkiyə futbolunun və “Fənərbaxça”nın gənc ulduzu Arda Gülərə görə aktualdı. 18 yaşlı futbolçunu “Mançester Siti” və “Barselona” başda olmaqla Avropanın bir çox önəmli klubu diqqətlə izləyir.