''Beşiktaş'' və Türkiyə yığmasının istedadlı sol cinah müdafiəçisi Rıdvan Yılmazın gələcək karyerasına nəhayət ki, aydınlıq gəlib.

Football-plus.az 21 yaşlı futbolçu bir müddət öncə ''Ayntraxt''la anlaşmışdı və məhz bu kluba keçməli idi. Amma Frankfurt təmsilçisi heç cür ''Beşiktaş''la anlaşa bilmədi və bu transfer baş tutmadı. Rıdvan Yılmaz yeni mövsümü Şotlandiya çempionatında keçirəcək. Belə ki, ''Reyncers'' həm futbolçunun özü, həm də ''ağ-qaralar''la anlaşma əldə edib. Xatırladaq ki, ötən mövsüm AL-in finalında məhz elə ''Ayntraxt''la ''Reyncers'' üz-üzə gəlmişdi. Almanlar penalti seriyasında üstün olmuşdular. Solaxay futbolçu artıq İspaniyada toplanışda olan İstanbul nəhənginin düşərgəsini tərk edərək tibbi müayinədən keçmək üçün Qlazqoya yollanıb. Onun düşərgəni tərk edərkən və türkiyəli jurnalistlərə açıqlama verərkən göz yaşlarını saxlaya bilməməsi diqqət çəkib. Keçidin maddi detallarına gəlincə, ''Beşiktaş''ın israrla 6,5 milyon avro tələb etməsindən sonra qlazqolular razılaşmalı olublar. Halbuki ''Reyncers'' əvvəlcə 4,5 milyon avro (+ 1,5 milyon avro bonus) təklif edirdi. Bundan başqa futbolçunun növbəti satışından əldən olunacaq pulun 20 faizi də ''Beşiktaş''a çatacaq. Rıdvan yeni klubu ilə beşillik müqavilə imzalayacaq. Onun illik məvacibi təxminən 1 milyon avroya bərabər olacaq.

Qeyd edək ki, Rıdvan ''Beşiktaş''ın öz yetirməsidi və 2009-dan bu yana klubdadı. 2019-da ilk peşəkar müqaviləyə imza atan oyunçu indiyə qədər ''Qartal''ın heyətində 52 superliqa matçında 4 qol, 7 məhsuldar ötürmə ilə fərqlənib.