“Görmək istədiyimiz matç bu deyildi. Komanda “döyüşmədi”. Rəqib daha istəkli görünürdü. Bu, birbaşa baş məşqçinin faydasız tapşırıqlarının nəticəsi idi. Baxımsız matç izlədik. Məşqçilər korpusundan narazıyıq.

“Şamaxı” mövsüm ərzində ədalət təmsilçilərinin ədalətsiz qərarları ilə də üzləşdi. Son matçda da İnqilab Məmmədovun idarəçiliyi fiasko idi. Sözün əsl mənasında məsuliyyətsiz davrandı. Özünü futbolla əlaqəsi olmayan, təcrübəsiz, dırnaqarası hakimlərdən biri kimi apardı. “Səbail”in futbolçuları topa iki dəfə əllə müdaxilə etdi. Elə bil ki, voleybol oynayırdılar. Franko Mazurekin qolu sayılmamalı idi. Görəsən, VAR sistemi niyə var?

Hakim səhvlərindən başqa klublar da əziyyət çəkir. Telekanallarda və sosial şəbəkələrdə görürük ki, nağıllarla rəzilliklərin üstünü örtürlər. Çoxu AFFA-nın tapşırıqlarını yerinə yetirir. Futboldan danışmağa haqları yoxdu. Bazası, infrastrukturu zəif olan komandalar diqqətdən kənarda qalır. Futbolun bölgədə inkişafına təkan verməkdənsə, paytaxt klublarını ön plana çıxarırlar…

Azarkeşlər olaraq oyuna ciddi hazırlaşmışdıq. Stadiona 7 sprinter və 1 avtobusla gəlmişdik. Komandamızı sona qədər dəstəklədik. Matçdan sonra rəhbərlik bizə təşəkkür etdi. Onların səhvi çox idi. Mövsümün əvvəlindən təxmin etmək lazım idi ki, yerli futbolçularla hədəfə çatmaq mümkün olmayacaq. Düzdü, hələ İcraiyyə Komitəsinin qərarı gözlənilir. “Şamaxı”nın premyer-liqada qalmaq ehtimalı var. Şəxsən istəmirəm ki, bu heyətlə elitada qalaq. Vaxt itirməyin mənası yoxdu. Heç kimə lazım olmayan futbolçularla uğur qazanmaq mümkün deyil.

“Şamaxı” deyəndə, gözümün önünə “İnter” gəlir. İstəməzdim ki, köklü tarixi olan klub iddialılar önündə aciz duruma düşsün. İdarə Heyəti səhv yoldadı. AFFA-nın qərarına bel bağlayıblar. Çoxdan islahatlara başlamalı idilər. “Şamaxı” elitada qalsa belə, komandanı dəstəkləməyəcəyik, nəinki birinci divizionda”.