Misli premyer-liqasının 36-cı - son turuna start verilib.

2 gün ərzində keçiriləcək vacib oyunlardan biri də "Səbail" - "Şamaxı" matçıdı. Qarşılaşmanın nəticələrinə əsasən iki klubdan biri premyer-liqanı tərk edəcək. Sözügedən oyuna təcrübəli İnqilab Məmmədov təyinat alıb.

Görəsən, referinin ayağı hansı kluba daha düşərlidi? Cavab üçün sözügedən klubların baş hakimin idarəçiliyi altında oynadığı matçlara nəzər salaq.

"Football-plus.az"ın araşdırmasına görə, fit sahibi ölkə çempionatının 11-ci turunda "Səbail" - "Şamaxı" (0:0) matçında komandaların hər birinə 3 sarı vərəqə göstərib. 1 qırmızı vərəqə isə "dənizçilər"ə qismət olub.

21-ci tur oyununda "Sabah"la üz-üzə gələn "Səbail" (4:0) darmadağın edildiyi matçda referi tərəfindən 2 sarı, hər iki komanda isə 1 qırmızı vərəqə ilə cəzalandırılıb.

Ədalət təmsilçisi 25-ci turun "Zirə" - "Şamaxı" (2:2) oyununda "şirlər"in həm futbolçusuna, həm də rəsmi şəxsinə sarı vərəqə göstərib. Zirəlilər isə 2 sarı vərəqə ilə qarşı-qarşıya qalıb.
29-cu turun "Səbail" - "Sabah" matçı Bayıl təmsilçisinin qələbəsi ilə başa çatıb - 2:1. Baş hakim ev sahiblərinə matç boyunca xəbərdarlıq etməyib. Masazırdan gələn qonaqlar isə 4 sarı, 1 qırmızı vərəqə ilə İnqilab Məmmədovun qəzəbinə tuş gəlib.

33-cü turun "Sumqayıt" - "Səbail" matçında hər iki komanda 3 sarı vərəqə ilə cəzalandırılıb. Qarşılaşmada "dənizçilər" qalib gəlməyi bacarıb (3:1).

Beləliklə, İnqilab Məmmədov mövsümboyu "Şamaxı"nın 2 (ikisi də heç-heçə), "Səbail"in 4 (2 qələbə, 1 heç-heçə, 1 məğlubiyyət) oyununu idarə edib. Statistika "Səbail"in xeyrinədi. Görək bu gün necə olacaq?

KƏNAN BAHADIR