Autsayderlərin azarkeşləri əsas suala son turda aydınlıq gələcəyini düşünür - AÇIQLAMALAR
Misli premyer-liqasının başa çatmasına az qalıb.
Hazırda mübarizənin ən gərgin dönəminə şahidlik edirik. İdman prinsiplərinə görə birinci diviziondan bir komanda gələcək ki, böyük ehtimalla bu “Araz Naxçıvan” olacaq. Digər tərəfdən, turnir cədvəlinin sonuncusu elitanı tərk edəcək. Hazırda “Səbail” 25, “Şamaxı” isə 24 xalla uyğun olaraq 9-10-cu pillələrdə qərarlaşıb. Bu komandalar, demək olar ki, yolun ən buruq döngəsindədi.
“Səbail” 35-ci turda “Turan Tovuz”la qarşılaşacaq. Bölgə təmsilçisi son 3 oyunda iddialı rəqiblərə qarşı əzmkar qələbələr qazanıb. Ayxan Abbasovun komandası “Zirə”ni 3:1, “Neftçi”ni 4:0, “Qəbələ”ni isə 2:1 hesabı ilə yenib. Məntiqi işə salsaq, “dənizçilər”in bu qarşılaşmada qələbə qazanacağı gözlənilmir. Sensasiya mütləqdi ki, bu da inandırıcı deyil. Son turda isə “Səbail” - “Şamaxı” matçı baş tutacaq. Bölgə təmsilçisi “Qəbələ” ilə matçdan məğlub ayrılsa, “dənizçilər”lə oyunda da büdrəyə bilər. Bu isə “şirlər”in birinci diviziona yuvarlanması anlamına gəlir.
Ümumilikdə bu mövsüm hər iki komanda, demək olar ki, eyni nəticələri əldə edib. Bu üzdən şanslar haqda ehtimal yürütmək belə çətindi. Son oyunda “Neftçi”dən xal almağı bacarsa da, oxlar hələ ki “Şamaxı”ya tuşlanıb. İndiki məqamda autsayderlərə könül verən azarkeşlərin fikirləri də maraq doğurur.
Bu üzdən onlara tribuna verdik. Öncə “Şamaxı”nın ən böyük fanklubu “Sektor 56”nın rəhbəri Loğman Məliklini dinləyək:
“Açığı, “Qəbələ” ilə qarşılaşmaya bel bağlaya bilmirik. Qələbənin çox çətin olduğunun fərqindəyik. Özüm iştirak edə bilməsəm də, fanklub üzvləri orda olub komandanı dəstəkləyəcək. “Səbail”lə qarşılaşma isə final ab-havasında keçəcək. Bu oyuna çox ciddi hazırlaşmışıq. “Səbail”in “Turan Tovuz”a, “Şamaxı”nın isə “Qəbələ”yə qalib gələ bilməyəcəyini düşündüyümüzə görə, bilirik ki, son qarşılaşma həlledici olacaq. Azarkeşlər inciməsin, istərdim ki, premyer-liqanı “Səbail” tərk etsin. Onsuz da Bakıda “Neftçi”, “Zirə”, “Sabah” kimi böyük klublar var. Bizim bir “Şamaxı”mız var, o da birinci diviziona düşsə, daha nə oldu? Böyük əziyyətlərdən sonra böyük futbola qayıtmışıq. İndi sıfırdan başlamağı təsəvvür etmək istəmirik. Qorxduğum başımıza gəlsə, “Sektor 56” olaraq azarkeşlikdən çəkilib-çəkilməyəcəyimiz qeyri-müəyyəndi. Buna digər üzvlərlə müzakirədən sonra qərar verəcəyik. Biz “Şamaxı” ilə fəxr edirik. Yerli futbolçulardan ibarət yeganə komandadı. Premyer-liqada belə klubun mübarizə aparması çox vacibdi. Ön sıralarda olmasa da, olar. Ümid son oyunadı. İnşallah, “Səbail”i məğlub edib premyer-liqada qalacağıq. Alınmasa, Şamaxı futbolu üçün ağır zərbə olacaq. İnanıram ki, həm klub rəhbərliyi, həm də heyət bunun yaşanmaması üçün əlindən gələni edəcək”.
“Səbail"i dəstəkləyən "Dənizçilər" fanklubunun rəhbəri Atif Rüstəmli ilə də danışdıq. Onun fikirləriylə də tanış olaq:
"Bu həftə son səfər oyununa çıxacağıq. "Turan Tovuz"la qarşılaşmada heç-heçə etmək və "Şamaxı" ilə son oyunda qələbə qazanmaq istəyirik. Heyətimiz rəqiblə müqayisədə bunun öhdəsindən gəlməyə qadirdi. AFFA-nın qərarının son anda dəyişib-dəyişməyəcəyini heç kim dəqiq bilmir. Bu üzdən məqsədimiz son pillədə yer almamaqdı. Ümumiyyətlə, 9-cu olmağa belə layiq deyilik. Bunun əsas səbəbi "Səbail"ə qarşı hədsiz hakim səhvləridi. Komandamız istər premyer-liqada, istərsə də divizionda çıxış etsin, "Dənizçilər" fanklubu dəstəyini əsirgəməyəcək".
KƏNAN BAHADIR
