Burak Yılmazdan yenə xəbər var. Məşhur türkiyəli forvardın Niderland karyerası cəmi 1 il çəkdi!


"Football-plus.az" xəbər verir ki, ötən sayımızda 37 yaşlı futbolçu ilə bağlı son xəbərləri nəzərinizə çatdırmışdıq. Burak “Fortuna”nın son 5 matçında meydana çıxmamış və onun adı bu oyunlarda heç iştirak ərizəsinə də düşməmişdi. Klubun icraçı direktoru Syurd Ars Türkiyə yığmasının sabiq kapitanının klubdakı gələcəyinin bəlli olmadığını bildirmiş və üstəlik “Burak əvvəlki formada olmadığını özü də bilir” açıqlamasını vermişdi. Bu açıqlamadan bir gün sonra Ars yenə də Niderland mətbuatına açıqlamasında “Burak futbolçu kimi klubumuzda ikinci mövsümə daxil olmaq istəmir” demişdi. Dünən Yılmaz “instaqram” səhifəsinin hekayə bölümündə belə bir paylaşım etdi: “Gələn mövsüm “Fortuna”da olmayacam. Ən qısa müddətdə başqan və rəhbərlik ilə danışıb bütün başverənlərə aydınlıq gətirəcəm. Sizlərə uğurlar arzulayıram”. Bu sözlərdən belə qənaətə gəlmək olar ki, Burak Yılmaz bir daha Sittard klubunun formasını geyməyəcək!

Xatırladaq ki, təcrübəli oyunçu ötən yay bu klubla beşillik müqavilə imzalamışdı. Bu müqavilənin 2 ili futbolçu, 3 ili məşqçi kimi nəzərdə tutulmuşdu. Yəni o, 2-ci ilini tamamlayandan sonra klubun akademiyasında məşqçi fəaliyyətinə başlamalıydı. Son aylar Burakın həm rəhbərlik, həm də fanatlar ilə münasibətləri gərgin idi. O, aprelin əvvəllərində “Fortuna” ilə vidalaşdığını açıqlamış, daha sonra isə fikrini dəyişmişdi. Eləcə də “Qroningen”lə oyunda öz fanatları tərəfindən fitə basılmışdı. O, həmin oyunda acıq edərək əvəzlənməkdən imtina etmiş və sona qədər meydanda qalmışdı. Son qolunu fevralda vuran Burakın “Fortuna”da 27 rəsmi oyunda 9 qol, 4 məhsuldar ötürmə ilə fərqləndiyini bildirək.