Ötən sayımızda tanınmış türkiyəli futbolçu Burak Yılmazla bağlı gözlənilməz xəbəri diqqətinizə çatdırmışdıq.

"Football-plus.az" xəbər verir ki, bilindiyi kimi, təcrübəli forvard Niderland təmsilçisi “Fortuna”nın şərəfini qoruyur. Bu mövsüm erediviziyada 25 qarşılaşmada 9 qol, 5 məhsuldar ötürməlik performans sərgiləyən 37 yaşlı futbolçu son paylaşımı ilə hamını təəccübləndirmişdi. “Fortuna”nın öz meydanında “Qroningen”i 3:1 hesabıyla yendiyi qarşılaşmanın ardından Burak “instaqram” səhifəsinin hekayə bölümündə vida sözləri yazmış və kluba gələcəkdə uğurlar arzulamışdı. Bu həm klubun fanatlarını, həm rəhbərliyi, həm də yerli mətbuatı şoka salmışdı. Çünki Burak ötən yay Sittard təmsilçisi ilə beşilllik müqavilə imzalamışdı və onun klubu belə erkən tərk edəcəyi gözlənilmirdi. Türkiyə mətbuatı iddia etmişdi ki, Burak “Qroningen”lə oyunda baş məşqçinin qərarına qarşı çıxdığı və son dəqiqələrdə əvəzlənmək istəmədiyi üçün rəhbərlik tərəfindən komandadan kənarlaşdırılmışdı. Sonra da futbolçu ayrılmaq qərarına gəlmişdi. Amma bu iddia yanlış imiş. Düzdü, Burak hələ də o qəribə paylaşımı ilə bağlı susqunluğu qoruyur və heç bir rəsmi açıqlama verməyib. Amma Niderland mətbuatında Türkiyə yığmasının sabiq üzvünün bu addımı atmasının səbəbləri ilə bağlı daha ağlabatan versiya ortaya atılıb. Məlum olub ki, “Fortuna”da ciddi maliyyə problemləri yaşanır. Rəhbərlik “Fortuna”lı oyunçulara ötən həftənin sonuna qədər martın məvacibinin ödəniləcəyinə söz vermişdi. Amma bu söz yerinə yetirilmədi. Burak bu baxımdan oyunçulara yardım edəcəyini və pulun ödənilməsi üçün əlindən gələni edəcəyini demişdi. Amma onun da səyi bəhrəsini verməyincə, tanınmış futbolçu acığa düşərək klubdan ayıldığını açıqlamışdı. Bu arada “Fortuna”nın maliyyə problemlərinin səbəbi də bəlli olub. Klubun sahibi və əsas hissədarı türkiyəli iş adamı Işıtan Gündü. Klubun səhmlərinin 20 faizi isə “Azerion” mobil video oyun şirkətinin yaradıcılarına – Atilla Aytəkin və Umut Akpınara məxsusdu. Onların ikisi də ötən il Niderlandda ən varlı 500 adamın siyahısına daxil edilmişdilər. Amma yaxınlarda “Azerion” şirkəti maxinasiyalarda günahlandırılmış və Atilla Aytəkin istefa verməli olmuşdu. Bu hadisədən sonra dəyəri 1,25 milyard avro olan şirkətin səhmləri 30 faiz ucuzlaşmışdı. “Azerion”la bağlı araşdırma davam edir. Həm oyunçulara, həm də menecerlik şirkətlərinə borcu olan “Fortuna” müvəqqəti də olsa, vəziyyətdən çıxış yolu tapa bilib. Klubun idman direktoru İvo Pfenninqs çərşənbə axşamı Niderland mətbuatına bunları deyib: “Martın maaşı bu gün oyunçuların hesabına yatırılacaq. Burak Yılmazla da görüşüb problemi yoluna qoymuşuq. Çərşənbə günündən etibarən məşqlərə çıxacaq”.