Bu yay sürpriz şəkildə Niderland təmsilçisi “Fortuna”ya transfer olunan tanınmış türkiyəli forvard Burak Yılmazdan xəbər var.

"Football-plus.az" xəbər verir ki, burakdan fərqli onun komandası mövsümə bərbad start verib. İlk iki turdakı məğlubiyyətdən sonra Sittard təmsilçisi son turda evdə “Kambur”la qarşılaşdı.

Yılmaz artıq 10-cu dəqiqədə komandasını hesabda önə keçirsə də, “Fortuna” qalan müddətdə 4 top buraxaraq darmadağın oldu! Bu məğlubiyyət baş məşqçi Syors Ultiyə baha başa gəldi və o, istefaya göndərildi. 2020-nin noyabrından “Fortuna”nı çalışdıran 35 yaşlı mütəxəssis erediviziya tarixinin ən gənc məşqçisi idi. Komanda onun başçılığı altında ötən mövsümü 11-ci yerdə bitirmişdi.

“Fortuna”nın 3 turdan sonra xalı yoxdu. Komanda 3 oyuna 3 top vurub və qapısından 10 qol buraxıb. Bu 3 qoldan ikisi Burakın hesabındadı. O, ilk turda “Ayaks”la qarşılaşmada da fərqlənmişdi. Bu arada Niderland mətbuatının yazdığına inansaq, “Fortuna”da hələ ki məşqləri Burak Yılmaz keçir! Yeni məşqçi bəlli olana qədər bu funksiyanı 37 yaşlı forvard yerinə yetirəcək. “Voetbal” nəşrinin yazdığına görə, Burak yeni məşqçi seçimində də rol oynayacaq. Axtarışlarını davam etdirən rəhbərlik onun da bu mövzuda fikrini öyrənəcək. Hətta şayiələrə inansaq, Burak həftəsonu “Herenven”lə səfər oyununda qələbə qarşılığında komandanın hər oyunçusuna öz cibindən 1000 avro (bəzi mənbələrdə 5 min avro qeyd olunub) mükafat vəd edib! Göründüyü kimi, hələ ki məşqçi lisenziyası olmayan Burak bu sahəyə indidən maraq göstərməyə başlayıb. Xatırladaq ki, Türkiyə yəğmasının sabiq kapitanı “Fortuna” ilə 2 ili futbolçu, 3 ili məşqçi kimi olmaqla beşillik qeyri-adi müqavilə imzalayıb.