“Burak Yılmaz əvvəlki səviyyəsində olmadığını anlayır”
Karyerasını Niderland təmsilçisi “Fortuna”da davam etdirən Burak Yılmaz bu klubda çətin dönəmdən keçməkdə və problemlər yaşamaqda davam edir.
“Football-plus.az” xəbər verir ki, Türkiyə yığmasının sabiq kapitanı ötən yay sahibi türk olan Sittard təmsilçisi ilə beşillik müqavilə imzalamışdı. Əslində mövsüm onun üçün pis başlamamışdı. Burak bir neçə vacib qol vurdu. Amma sonradan işlər dəyişdi. 33 oyuna 35 xal toplayan və 13-cü pillədə qərarlaşan “Fortuna” gələn mövsüm üçün erediviziyadakı yerini rəsmiləşdirib. 37 yaşlı Burak aprelin 2-də “Qroningen”lə ev oyununda (3:1) öz fanatları ilə problemlər yaşamışdı. Fitə basılan 37 yaşlı futbolçu əvəzlənmə zamanı meydandan çıxmaqdan imtina etmiş və sona qədər meydanda qalmışdı. Ertəsi gün Burak sürpriz bir paylaşım edərək fanatlara təşəkkürünü bildirmiş və kluba gələcəkdə uğurlar arzulamışdı. Sonradan məlum olmuşdu ki, onun bu addımı klubda yaşanan maliyyə problemləri ilə bağlıdı. İdman direktoru İvo Pfennings Niderland mətbuatına verdiyi açıqlamada “Burakla artıq görüşmüşük. Mart ayının məvacibləri bu gün futbolçuların hesablarına köçürüləcək. Burak da məşqlərə çıxmaqda davam edəcək” ifadəsini işlətmişdi. Türkiyəli hücumçu həmin oyundan bir həftə sonra “Ayaks”la qarşılaşmada (0:4) da start heyətində meydana çıxdı və 79-cu dəqiqədə əvəzləndi. Amma Amsterdamdakı görüş Burakın “Fortuna”nın formasını geydiyi hələ ki son matçdı. Yəni bu futbolçu komandasının son 5 matçının heç birində iştirak etməyib! Onun adı heç iştirak ərizəsinə də düşmür. Burakın nə üçün oynamadığı barədə nə Türkiyə mətbuatında xəbər var, nə Niderland. Onun mövsümün sonunda ayrılacağı barədə xəbərlər isə səngimək bilmir.
Bu arada “Fortuna”nın icraçı direktoru Syurd Ars Burak Yılmaz haqda diqqətçəkən açıqlamalar verib:
“Burakın klubdakı gələcəyi ilə bağlı danışıqlar davam edir. Həm klubun, həm də futbolçunun düşüncələri çox önəmlidi. Hələ ki heç bir qərar qəbul olunmayıb. Bəlkə də o bura gələrkən “Fortuna”nın daha yaxşı nəticələr əldə edəcəyinə ümid bəsləyirdi. Amma çox güman, o özü də artıq əvvəlki səviyyəsində olmadığını anlayır. Bu da onun yaşında çox normaldı. “Qroningen”lə qarşılaşmada fanatlarla arasında yaşanılanlar da unudulmayıb. Bütün bunları bir araya gətirəndə durumun nə üçün bu qədər qəliz olması aydınlaşır”.
Burakın “Fortuna”da 27 rəsmi oyunda 9 qol, 4 məhsuldar ötürməlik performans sərgilədiyini də bildirək. O, son qolunu fevralda “Valveyk”in qapısından keçirib.
Digər xəbərlər
