Startı yanvarın 28-də verilən Argentina çempionatının yeni mövsümündə fevralın 4-7-si aralığında 2-ci turun oyunları keçirildi. Tur daha çox ötən mövsümün mükafatçılarının qələbə qazana bilməməsi ilə yadda qaldı.

Football-plus.az xəbər verir ki, mövsümə “Atletiko Tukuman” üzərində qələbə (1:0) ilə başlayan “Boka Xuniors” növbəti ev oyununda büdrədi. Son çempion “Sentral Kordoba” ilə qolsuz heç-heçəyə razılaşdı. Meydan sahibləri rəqibini yalnız topa böyük ölçüdə - 72 faiz yiyələnməkdə üstələdilər. Qalan göstəricilər isə təxminən bərabər oldu. Tərəflərin qapıya hərəyə 3 dəqiq zərbə endirdiyini və qapıçıların bütün zərbələri dəf etdiyini də bildirək. 66-cı dəqiqəyə təsadüf edən epizodu xüsusi vurğulamalıyıq. “Sentral Kordoba”nın qazandığı penaltini Kastelli qola çevirə bilmədi. Hücumçunun zərbəsini “Boka Xuniors”un 35 yaşlı qapıçısı Serxio Romero dəf etdi. Nəticədə paytaxtdakı matç başladığı hesabla sona çatdı.

Son mövsümdə çempionluq şansını dramatik şəkildə əldən verən vitse-çempion “Rasinq” azarkeşlərini yenə məyus etdi.
Yeni “futbol ili”nə evdə “Belqrano” ilə heç-heçə oynamaqla başlayan Fernando Qaqonun komandası “Arxentinos Xuniors”a qarşı səfər matçını əliboş başa vurdu. Qonaqların 36-cı dəqiqədən sona qədər 10 nəfərlə mübarizə apardıqlarını qeyd edək. Sağ cinah müdafiəçisi Kaseresin kobud oyuna görə qarşısında birbaşa qırmızı vərəqə görməsi avelyanedalıların işini daha da çətinləşdirdi. Onların çilili qapıçısı Aryas oyun ərzində 5 dəfə seyv etsə də, 74-cü dəqiqədə Kabralın zərbəsi qarşısında aciz qaldı. Bu mövsüm ilk məğlubiyyətini alan “Rasinq”dən belə başlanğıc gözlənilmirdi.

Ölkə çempionatının bürünc mükafatçısı “River Pleyt” yeni çalışdırıcı ilə uğurlu start götürsə də, növbəti oyun paytaxt komandası üçün uğursuz alındı.

Ötən ilin sonunda komandadakı 8 illik fəaliyyətini başa vuran Marselo Qalyardonun xələfi Martin Demiçelisin baş məşqçi kimi ikinci sınağı “Belqrano” ilə səfər oyununa təsadüf etdi. Ev sahibləri oyun planında rəqibdən aşkar geri qalsalar da, ölkə nəhəngindən maksimum xal ala bildilər. Bunun əsas səbəbi “Belqrano”nun effektli oyunu ilə bağlı oldu. Demiçelisin komandası 37 yaşlı Roxas və 34 yaşlı Veqetti ilə bacarmadı: oyundaşının iki ötürməsini dəyərləndirən Veqetti komandasının 2:1 hesablı qələbəsini təmin etdi.
Xunin şəhərindəki oyunda da maraqlı fakt qeydə alındı. “Sarmyento” – “Barrakas Sentral” matçında 8 qol vuruldu.

Qondou ilə Sepulveda ev sahiblərinin 3:5 hesabı ilə uduzduqları oyunda cari mövsümdə het-trik edən ilk oyunçular oldular.