Startı aprelin 15-də verilən Braziliya çempionatının yeni mövsümündə ayın 22-25-i aralığında 2-ci turun oyunları keçirildi. Artıq turnir cədvəlində ikihakimiyyətlilik yaranıb.

2022-ci il mövsümünün çempionu olan “Palmeyras” ilk xallarını hesabat turunda itirdi. Abel Ferreyranın komandası “Vasku da Qama” ilə səfər oyununun ilk hissəsində böyük çətinliklərlə üzləşdi. Ev sahibləri ardıcıl iki qolla san paululuları şoka saldılar. Amma çempion şokdan qurtulmağı bacardı. Bəlkə də fasilə ərəfəsində Rafael Navarro fərqi bir topa endirməsəydi, rio de janeyrolular sonda qələbəni bayram edəcəkdilər. Lakin ilk hissənin sonunda vurulan qol çempionun ikinci yarıda təşəbbüsü ələ almasına şərait yaratdı. Arturun dəqiq zərbəsi olduqca kobud axarda keçən matçın nəticəsini müəyyən etdi – 2:2.

Vitse-çempion “İnternasyonal” evdə “Flamenqo” ilə qarşılaşdı. Hesabı 63-cü dəqiqədə qonaqlar açsalar da, qalan vaxtda meydan sahibləri geridönüş edə bildilər. Matçın qəhrəman Maurisio oldu. 21 yaşlı yarımmüdafiəçi iki qol vurmaqla “İnternasyonal”ın qələbəsini təmin etdi.

Son mövsümün bürünc mükafatçısı isə ardıcıl ikinci qələbəni qazandı. “Fluminense” evdə “Atletiko Paranaense”nin qapısından iki cavabsız top keçirdi. İki oyuna maksimum xal qazanan Fernando Dinizin komandası topların daha yaxşı fərqinə əsasən 1-ci yerə sahib çıxdı.

“Botafoqo”nun da hesabında 6 xal var. Portuqaliyalı Luiş Kastronun çalışdırdığı rio de janeyrolular səfərdə “Bayya”dan maksimum xalı 2:1 hesablı qələbə ilə ala bildilər.

Yeni mövsümdən A seriyasında oynamaq hüququ qazanan komandaların oyunu da diqqət mərkəzində idi. “Kruzeyro” öz meydanında “Qremio”dan bir qolla üstün oldu.