"Qəbələ" çempionatımızda kreativ oyun sərgiləyən klublardandı. Hazırda bu komanda avrokuboka getməyə daha yaxındı, nəinki "Zirə". Amma məsələyə fərqli yöndən yanaşaq. Komandanın maliyyə durumu hazırda ürəkaçan deyil. "Qırmızı-qaralar" sabah Konfrans Liqasına getsə, orda da uğurlu çıxış edə biləcəkmi?! "Qəbələ" hazırkı heyətini qorumaqla yanaşı, daha bir neçə uğurlu transfer etsə, düşünə bilərik ki, Konfrans Liqasının pley-offuna qədər irəliləyəcək. Amma heyətini qoruya bilməsə, maliyyə məsələlərində yaxşılaşma olmasa, komandanın avrokuboklara qatılıb elə ilk mərhələdə uğursuzluğa düçar olması yaxşı olmayacaq. Belədə "Zirə"nin 4-cü yeri tutub qitəmiqyaslı yarışlara qoşulmasını daha məqsədəuyğun sayıram. Klubun sponsoru, yaxşı maliyyəsi var, heyətini qorumaqla, daha yaxşı transferlər etməklə Konfrans Liqasında ölkəmizi uğurla təmsil edə bilər. "Səbail" - "Şamaxı" oyununa gəlincə, indiən nəsə demək çox çətindi. Hər iki komanda elitada qalmaq üçün çarpışır. "Şirlər" elitanı tərk etsə, heyətində inkişaf etdirdiyi yerli futbolçuları itirəcək və xeyli zəifləyəcək. "Dənizçilər" 1-ci diviziona yuvarlansa, sponsorunu itirəcək. Ona görə bizi qarşıda çox gərgin və maraqlı oyun gözləyir".