“Qəbələ” yeni legionerlərlə danışıqlara başlayıb - ÖZƏL
Bu yay ölkəmizi avrokuboklarda təmsil edəcək 4 klubdan biri “Qəbələ” olacağı bəllidi.
“Qırmızı-qaralar” çətinliklə də olsa bu missiyanın öhdəsindən gəlməyi bacardı. Ancaq bir məsələ var ki, çoxları bölgə təmsilçisinin hazırkı vəziyyətini nəzərə alıb komandanın Konfrans Liqasında uğursuzluğa düçar olacağını proqnozlaşdırır. Əslində bu cür düşünənləri də qınamaq olmur. Çünki, büdcənin az olması, kasad heyət - “Qəbələ”yə böyük ümidlər bəsləməyə əsas vermir.
Bəs görəsən, klub rəhbərliyi bu məsələ barədə nə düşünür? Avrokuboklar ərəfəsində “Qəbələ”dən müsbətə doğru hər hansı dəyişik gözləmək olar, yoxsa heç bir yenilik olmayacaq? Bu suallara cavab tapmaq üçün “qırmızı-qaralar”ın idman direktoru Nail Kərimovla əlaqə saxladıq. İdman direktoru “Football-plus.az”a açıqlamasında bunları söylədi:
“Məncə, biz belə fikirləri kənara qoymalıyıq. Necə ki, bunu çempionatın gedişatında etdik. Demək olar əksər mütəxəssislər, jurnalistlər avrokuboklara namizəd kimi başqa komandaları favorit kimi görürdülər. Bu cür düşünənləri də qınamaq olmaz. Çünki, həmin kollektivlər kənardan daha güclü görünürdülər. Biz isə mübarizəni sona qədər apardıq və bu fikirlərin heç birinə çox əhəmiyyət vermədik. Müsbət nəticəsini də gördük. O ki qaldı Konfrans Liqasında necə çıxış edəcəyimizə, hələ qarşıda iki aydan da çox vaxt var. Həmin müddətə qədər hazırlığımız davam edəcək. İlk işimiz müqaviləsi başa çatan öz futbolçularımızla danışıqları yekunlaşdırmaqdı. Demək olar hamı ilə danışıqlara başlamışdıq və yaxın vaxtda da yekunlaşdıracağıq. Heyəıti formalaşdırandan sonra qalır uğurlu təlim-məşq toplanışı keçmək”.
Nail bəy bizimlə söhbətdə mövsümlərarası fasilədə yeni oyunçuların dəvət olunacağını da bildirdi:
“Heyəti gücləndirmək yönündə artıq çalışmalara başlamışıq. Komandaya yeni oyunçular cəlb olunacaq. Həm yerli, həm də bir neçə legionerlə artıq danışıqlara başlamışıq. Ancaq hələ heç nə dəqiqləşmədiyindən sizə konkret ad deyə bilməyəcəm”
İdman direktoru mövsümlərarası fasilədə təşkil olunacaq təlim-məşq toplanışına da toxundu: “İlk mərhələni Qəbələdə keçəcəyik. Büdcə dəqiqləşəndən sonra ikinci mərhələnin harda təşkil olunacağı da müəyyənləşəcək”.
RƏŞAD
Digər xəbərlər
