“Qarabağ” “Səbail”i məğlub edəcəyi halda “Sabah” üçün əlçatmaz olacaq, 10-cu çempionluğu rəsmiləşdirəcəkdi. Bu səbəbdən də Qurban Qurbanov və yetirmələri oyuna ciddi yanaşırdı.

Elitada qalmaq uğrunda mübarizə aparan “dənizçilər” isə güclü rəqibə asanlıqla təslim olmaq fikrində deyildi. Artıq 6-cı dəqiqədə Ağabala hesabı açmağa yaxın oldu. Kapitan Mirabdullanın ötürməsini qüvvətli zərbə ilə “çərçivə”yə yönəltsə də, Şahruddin yerində idi. Süni örtük üzərində özünü elə də rahat hiss etməyən “Qarabağ”ın futbolçuları yavaş-yavaş üstünlüyü ələ aldı. 19-cu dəqiqədə Veşoviçin qapıya paralel ötürməsinə toxunan olsaydı, hesab açılacaqdı. Az sonra Musanın aşırma zərbəsindən sonra top dirəkdən döndü. Bir qədər sonra Qurbanlı yenidən diqqət mərkəzinə düşdü. Onun qüvvətli zərbəsindən sonra Balayev ustalıqla topu dəf etdi.

Sonradan məlum oldu ki, hücumçu zərbə anında oyundankənar vəziyyətdə imiş… Hissənin ortalarına doğru “Səbail” daha çox müdafiəyə diqqət ayırır, güclü rəqibi qarşısında səhv etməməyə çalışırdı. Meydan sahibləri yalnız fasilə ərəfəsində fəallaşdı. 43-cü dəqiqədə künc nöqtədən qapı qarşısına ötürülən topu Şahruddin uzaqlaşdırandan sonra cərimə meydançasında qarışıqlıq yarandı. Bu an Martinov Medina ilə toqquşub yerdə qaldı. “Dənizçilər” hakimdən penalti tələb etsə də, Umudlu oyunu davam etdirdi. Bu dəqiqələrdə yağış da sürətini artırmış, futbolçuları əməlli-başlı islatmışdı. Belədə hakimin fasiləyə işarə edən fiti də yerinə düşdü.

Oyunda əsas hadisələr 2-ci hissədə cərəyan etdi. “Qarabağ” qələbə qazanmaqda israrlı olduğunu ardıcıl hücumlarla göstərirdi. Yağışın sürəti artdıqca qonaqların da təzyiqi artır, meydan sahibləri isə bunun qarşısında əlacsız görünürdü. Bununla belə, Balayevin qoruduğu qapıya qol vurmaq mümkün olmurdu. Həlledici məqamlarda ya qapıçı xilaskara çevrilir, ya da “Qarabağ”ın qol ümidi olan futbolçuların zərbələrində dəqiqlik çatmırdı. Hücumçuların çarəsiz qaldığını görən Bəhlul Mustafazadə çətin məqamda səhnəyə çıxdı və qol vurmaq məsuliyyətini öz üzərinə götürdü.

71-ci dəqiqədə Yankoviçin künc zərbəsindən qapı qarşısına havalandırdığı topu müdafiəçi yüksələrək tora qovuşdurdu. Bu qol “Qarabağ”ı ruhlandırdısa, “Səbail”in mübarizə əzmini qırdı. Təsadüfi deyil ki, inamla müdafiə olunan meydan sahibləri tezliklə ikinci qolu qapısında gördü. Şeydayevin həmləsindən sonra top cərimə meydançasında Cabir Əmirlinin əlinə toxundu. VAR-ın çağırışını dinləyən Kamal Umudlu təxminən üçdəqiqəlik məşvərətdən sonra özü monitora doğru yönəldi və penalti nöqtəsini göstərdi. Topa yaxınlaşan Şeydayev büdrəmədi.
Əvəzetmədən oyuna qoşulan Qomis komandasını ümidləndirməyə yaxın oldu. Sürətlə irəliləyən legionerin zərbəsi qeyri-dəqiq alındı. 86-cı dəqiqədə isə Toralın qüvvətli zərbəsini qaytarmağa çalışan Balayev topu Şeydayevin önünə atdı. Hücumçu bu “hədiyyə”ni məmnuniyyətlə dəyərləndirdi. 3:0 hesablı qələbəyə sevinən “Qarabağ” ümumilikdə 10-cu, son 10 ildə 9-cu çempionluğu bayram etdi.

Gözdən qaçmadı
* “Qarabağ” azarkeşlərinə ayrılan sektor tam dolmuşdu. Həm “İmarət Tayfa”, həm də “Qarabağ Ordu” yerini almışdı. Meydan sahiblərini dəstəkləyən “Dənizçilər” fanklubu isə orta sektorlarda yerləşmişdi.
* Matçın startında “İmarət Tayfa”nın xüsusi xoreoqrafiyası diqqəti çəkdi. Azarkeşlər əllərindəki rəngli kağızlarla “Qarabağ” çempion” yazısını nümayiş etdirdi.
* Oyunöncəsi isinmə hərəkətləri zamanı ağdamlıların zədəli futbolçusu Benzya da meydanda idi. O, oğlu ilə birlikdə ehtiyat oyunçular skamyasında əyləşmişdi. Məşqin sonlarında Qara Qarayev əlcəzairlinin oğlu ilə paslaşırdı. Həm Benzya, həm də Zubir görüşü tribunadan izlədi.
* Matçı tribunadan izləyənlər arasında “Kəpəz”in baş məşqçisi Tərlan Əhmədov da var idi.
* Final fitindən sonra Qarabağ”ın fanatları meydana axışdı. Onlar çempionluğu komanda ilə birgə qeyd edir, məşəllər yandırırdı.

İSMAYIL XEYRULLAYEV