İtaliya A seriyasında çempionun adı məlum oldu. Neapol şəhətinin qüruru “Napoli” 33 illik həsrətə son qoyub, çempionluq kubokunu başı üzərinə qaldırdı.

“Barselona”nın da İspaniyada növbəti çempionluğunu bayram etməsinə elə də çox qalmayıb. Qardaş Türkiyədə isə “Qalatasaray” buna çox yaxındı. Mövsümə heç də yaxşı start verməyən “sarı-qırmızılar” Okan Burukun rəhbərliyi altında uğurlu seriya yaxalayıb, rəqiblərini üstələməyi bacardı. Əzəli rəqiblərin qeyri-sabit çıxışı da “aslanlar”ın qızıla gedən yolunu xeyli hamarlaşdırıb. Buna görə də əksər mütəxəssislər “Qalatasaray”ı növbəti çempionluq kubokuna yaxın sayır, azarkeşlər də uğura inanır, bayrama hazırlaşır. Bizim azarkeşlərin yaxından maraqlandığı, sevə-sevə izlədiyi İngiltərədə də çempionat həlledici mərhələyə qədəm qoyub. “Şəhərlilər”lə “topçular”ın nəfəskəsən mübarizəsi birincilərin xeyrinə həllini tapmaqdadı.

Bütün bunlar öz yerində. Bizdə, Misli premyer-liqasında vəziyyət necədi? Düzdü, bizim futbol azarkeşlərinin böyük əksəriyyəti yerli çempionatla maraqlanmır, onlar üçün “böyük beşlik”də, yaxud da Türkiyədə gedən mübarizə daha cəlbedicidi. Amma bu acı reallıq belə bizim çempionatı dəyərdən salmamalıdı. Hər necə olsa, öz futbolumuzu sevməli, klublarımızla maraqlanmalı, diqqətimizi Azərbaycan çempionatına yönəltməliyik.

Atalarımız “varını verən utanmaz” deyib. Bizim də olanımız budu. Qəbul etməliyik ki, bu çempionatın inkişafı həm də özümüzdən asılıdı. Nə qədər çox azarkeş marağı, tələbkarlıq olsa, klublar və futbolçular da öz üzərində bir o qədər məsuliyyət hiss edəcək.

Avropanın bir çox ölkələrində olduğu kimi, bizdə də mövsüm sona yaxınlaşır. Hələ neçə tur öncədən mükafatçıların adları məlum idi. Bilinirdi ki, “Qarabağ”, “Sabah” və “Neftçi” medalları öz aralarında bölüşdürəcək. Qalırdı həmin əyarı müəyyənləşdirmək, kimin hansı medalı qazandığını dəqiqləşdirmək. Artıq bu suallar da cavabını tapıb. “Neftçi”nin bürünc medal qazanacağı rəsmiləşib, “ağ-qaralar” üçün “Sabah”la “Qarabağ” əlçatmazdı. Elə bu tur “Qarabağ” da “Sabah” üçün əlçatmaz rəqibə çevrilə bilər. “Köhlən atlar” Bayılda qələbə qazansa, “Sabah” qalan oyunların nəticəsindən asılı olmayaraq, “Qarabağ”a çata bilməyəcək. Çünki hazırda “Sabah”ın 77, “Qarabağ”ın 84 xalı var. Autsayderlərdən sayılan “Səbail” “Qarabağ”ı durdura bilməsə, mövsümün çempionunun adına da aydınlıq gələcək.
“Sabah”ı ümidləndirən yeganə məqam budu ki, “Səbail”in özünə indi qələbə hava-su kimi lazımdı. “Dənizçilər” premyer-liqada qalmaq uğrunda mübarizə aparır. Ötən tur “Sumqayıt”ı səfərdə məğlub edən Şahin Diniyevin komandası “Şamaxı”nın da uduzması sayəsində sonuncu pilləni tərk edib. İndi əsas hədəf qalan üç tur ərzində uduzmamaqdı ki, “Şamaxı” “Səbail”in yerini yenidən ələ keçirməsin.

Məhz bu məqamı nəzərə alanda “Səbail”in “Qarabağ”a qarşı 90 dəqiqə mübarizə aparacağına, asanlıqla təslim olmayacağına inanmaq olar. Özü də “Səbail”in işini asanlaşdıran çox vacib bir məqam da var. Bu da “ASCO Arena”nın süni örtüklü meydançasıdı. “Qarabağ”ın süni örtük üzərində oynamağa çətinlik çəkdiyi bizim üçün yenilik deyil. “Səbail”in elə həmin meydanda “Qarabağ”la heç-heçə oynamasını, daha sonra “köhlən atlar”ın Bayıldan 1:3 hesablı yenilgi sayəsində xalsız dönməsini unutmamışıq. Bütün bunlar yaxın keçmişin nəticələridi.

Bu məqamları nəzərə alanda, Azərbaycan çempionunun adının Bayıldakı oyundan sonra rəsmiləşəcəyini demək çox çətindi. İstənilən halda, “Səbail” – “Qarabağ” görüşünü maraqla gözləmək üçün xeyli səbəb var. Qarşılaşmanın maraqlı keçəcəyi şübhə doğurmur. Sonrasını da növbəti yazılarımızda müzakirə edərik.

AMAL