Azərbaycan kubokundan və avrokuboklardan əlini üzən “Qarabağ” artıq bütün diqqətini Misli premyer-liqasına yönəldib.

Cəmi bir “cəbhə”də mübarizə aparmaq Qurban Qurbanovun da işini asanlaşdırıb. Mütəxəssis əlinin altındakı heyətdən rahat istifadə edir, ciddi rotasiyalara ehtiyac duymur. Elə bunun da nəticəsində “Qarabağ” yoluna məğlubiyyətsiz davam edir, hər keçən tur çempionluğa bir addım da yaxınlaşır. Çətin ki, kiminsə komandanın növbəti çempionluğu bayram edəcəyinə şübhəsi olsun. Yeganə sual bu çempionluğun neçənci turda rəsmiləşəcəyidi ki, hadisələrin axarı “Qarabağ” azarkeşləri üçün əlamətdar olacaq tarixin elə də uzaqda olmadığından xəbər verir. “Səbail”lə oyun da bu yolda atılan növbəti addım oldu. “Qarabağ” rəqibini asanlıqla, özü də böyük hesabla məğlub etdi.

Rəvan Həmzəzadəni start fitindən dərhal sonra Medvedevin səhvi “Qarabağ”a baha başa gələ bilərdi. Topla səliqəsiz davranan kapitan yalnız ikinci cəhddə təhlükəni sovuşdura bildi. 10-cu dəqiqədə Veşoviç hesabı aça bilərdi. Onun zərbəsindən sonra Balayev topu çətinliklə meydandan çıxardı. Çox keçmədi ki, Andradenin zərbəsi qapıdan aralı keçdi. Bütün bunlar yetişən qolun xəbərçisi idi. Qol pərdəsini Cəfərquliyev açdı. Müdafiəçi sağ cinahla sürətlə irəliləyib cərimə meydançasına daxil oldu. Komanda yoldaşları ondan ötürmə gözləsə də, Elvin bitirici zərbəni də özü vurdu. Bundan 10 dəqiqə sonra “Qarabağ” azarkeşləri ikinci qola sevindi. Bu dəfə Zubir ustalığını göstərdi. O da cinah müdafiəçilərini birnəfəsə keçib qapı qarşısında yer alan Qurbanlıya məhsuldar ötürmə verdi. Gənc hücumçuya topa başla asta toxunmaq və onu tora qovuşdurmaq qalırdı. Yeri gəlmişkən, bu, Musa üçün mövsümdə 18-ci oldu və Qurban Qurbanovun oğlu bombardirlər siyahısında vahid liderə çevrildi.

44-cü dəqiqədə “Səbail” qola yaxın oldu. Qomis fərdi keyfiyyətlərini nümayiş etdirərək oyunu öz üzərinə götürdü. Sol cinahla uzun məsafə qət edən futbolçu “çərçivə”ni görən kimi hədəfi nişan almağa çalışdı. Onun qüvvətli zərbəsini Quqeşaşvili çətinliklə uzaqlaşdırdı.

Fasilədən, daha dəqiq desək, Almeydanın 53-cü dəqiqədə yerinə yetirdiyi cərimə zərbəsindən sonra müdafiəçilər kortəbii şəkildə topu uzaqlaşdırmağa çalışdı. Nəticədə top Romaonun ayağına gəldi. Braziliyalı yarımmüdafiəçi qüvvətli və qarşısıalınmaz zərbəylə “Qarabağ”ın üstünlüyünü üç topa çatdırdı. Qoldan sonra ağdamlılar bir qədər arxayınlaşdı. Artıq onların doğma meydanda qələbə qazanacağına şübhə yeri qalmamışdı. Təsəlli qolu vurmaq üçün irəli atılan “Səbail”i Luka “mükafatlandıra” bilərdi. Üzərinə gələn topu əlindən buraxan qolkiper oyuna sonradan qoşulan Luvaqanın fərqlənməsinə şərait yaratdı. Maksimin əngəlləməyə çalışdığı futbolçunun zərbəsində dəqiqlik və güc çatmadı. 61-ci dəqiqədə fərq 4-ə yüksələ bilərdi. Cəfərquliyev Qurbanlının fərqlənməsi üçün əla şərait yaratdı. Amma bu dəfə Musanın baş zərbəsi hədəfdən aralı keçdi. Bir qədər sonra Balayev Şeydayevin qüvvətli zərbəsini ustalıqla dəf etdi. Bu dəqiqələrdə “Qarabağ”ın düşərgəsində qısamüddətli gərginlik yaşandı. Geriyə ötürmə edən Elvinin zərbəsi bir qədər qüvvətli alındı. Luka onu ram etməyə çətinlik çəkincə, topu qapı xəttindən kənara çıxarıb, “Səbail”ə künc zərbəsi qazandırdı. Bu isə futbolçular arasında gərginliyə səbəb oldu. Kapitanın müdaxiləsindən sonra “dalaşanlar” sakitləşdi. Gürcü qapıçı bacarığını 89-cu dəqiqədə nümayiş etdirdi. Kizito yaxın məsafədən başla qapını dəqiq nişan alsa da, Luka “Səbail”in təsəlli qoluna sevinməsinə imkan vermədi.

Gözdən qaçmadı

* “İmarət Tayfa” stadiona gəlməmişdi. Bunun səbəbini öyrənərkən məlum oldu ki, oyunla eyni saatda fanklubun üzvünün toy mərasimi başlayıb.
* “Qarabağ Ordu” isə tribunada idi. Azarkeşlər 90 dəqiqə komandaya dəstək verdi.
* “Səbail”in sonuncu pillədə qərarlaşmasına baxmayaraq, azsaylı azarkeşləri tribunada yerini almışdı. “Dənizçilər” matçboyu komandaya dəstəyini nümayiş etdirdi.