Ağdamlılar indidən qarşıdakı mövsümün hazırlığına başlayıb.

"Football-plus.az" xəbər verir ki, "Qarabağ" yeni uğurlar əldə etmək üçün heyəti formalaşdırmaq istəyir. Bu səbəbdən də bir sıra futbolçularla danışıqlara start verilib.

Bunlardan biri hazırda Portuqaliya "Famalikan"ında çıxış edən Jonder Kadisdi. 190 sm boya malik venesuelalı hücumun həm sağında, həm də mərkəzində oyanır. O, bu mövsüm komandasının heyətində 33 matçda meydana çıxıb. Bu görüşlərdə 11 qol vurub, 3 məhsuldar ötürmə verib.
Karyerasına ölkəsinin "Departivo Miranda" klubunda başlayan Kadis "Karakas", "Uniao Madeyra", "Nasyonal", "Moreyrense", "Monaqas", "Vitoriya Setubal", "Benfika”, "Dijon", "Neşvill"də də çıxış edib. Karyerası ərzində ümumilikdə 220 matçda meydanda olub. Bu görüşlərdə 45 qol vurub, 20 məhsuldar ötürmə verib. 27 yaşlı forvard ölkəsinin milli komandasına da dəvət olunub. Amma 5 görüşdə meydana çıxsa da, hələ ki qol vura bilməyib.

Bu arada "Qarabağ"ın futbolçusu Yassin Benzya zədələnib. Klubdan verilən açıqlamaya görə, 28 yaşlı yarımmüdafiəçi təxminən 15-20 gün yaşıl meydanlardan kənarda qalacaq. Müayinə zamanı onda 2-ci dərəcəli əzələ dartılması aşkarlanıb. Qeyd edək ki, fransalı futbolçunun adı Misli premyer-liqasının 33-cü turunda "Qəbələ" ilə görüşün ərizəsinə salınmamışdı. Benzya fevralda da zədə üzündən 1 ay meydana çıxmamışdı.

İLKİN SULTANLI