Premyer-liqanın 28-ci turunda “Qəbələ”ni 3:2 hesabı ilə məğlub edən “Sabah” avrokuboklara vəsiqəni təmin etdi. Klub tarixində ilk dəfə beynəlxalq arenada mübarizə aparacaq.

“Football-plus.az” xəbər verir ki, “bayquşlar” mövsümün sonuna 8 tur qalsa da, indidən qarşıdakı “futbol ili”nə hazırlaşmağa başlayıb. Masazır təmsilçisi Konfrans Liqasına ciddi hazırlaşır. Murad Musayevi qayğılandıran əsas məsələ Aleksey Kaşukun komandada qalıb-qalmayacağıdı. Klub rəhbərliyi də ukraynalının kollektivdən ayrılmaq ehtimalını nəzərə alaraq yeni futbolçu axtarışına başlayıb. Redaksiyamıza daxil olan məlumata görə, “bayquşlar” Fransa “Dijon”unda çıxış edən Xande Silva ilə yaxından maraqlanır. 26 yaşlı portuqaliyalı hücumun mərkəzində və sağında çıxış edə bilir. O, bu mövsüm Liqa 2-də 23 matçda meydana çıxıb, 6 qol vurub, 2 məhsuldar ötürmə verib.

Futbolçu karyerasına ölkəsinin “Alverka” klubunda başlayıb. Daha sonra “Belenenseş”, “Sportinq”, “Gimarayeş”, “Vest Hem”, “Aris” (Saloniki) və “Nottinqem Forest”də çıxış edib. Xande Portuqaliyanın əsas millisindən başqa digər yaş qrupları üzrə bütün komandalarının üzvü olub.
Maraq üçün qeyd edək ki, futbolçunun “Dijon”la 2025-ci ilin iyununa kimi müqaviləsi var. “Transfermartk”da onun dəyəri 600 min avro göstərilib.

İLKİN SULTANLI