Bu həftəsonu Türkiyə çempionatında tur oynanılmayacaq. Qardaş ölkədə mayın 14-də prezident seçkiləri keçiriləcək. Bu üzdən 34-cü tur növbəti həftəiçi, yəni mayın 16-18-də baş tutacaq. Bunu nəzərə alaraq ''Fənərbaxça''nın baş məşqçisi Jorje Jezuş oyunçulara 3 günlük istirahət vermişdi.

"Football-plus.az" xəbər verir ki, onlardan bəziləri bu qısa tətili xaricdə keçirməyi planlaşdırırdı. Hətta təyyarəyə bilet sifariş verənlər də var idi. Amma ''Fənərbaxça'' rəhbərliyi son uğursuzluqlara görə bir növ oyunçuları cəzalandıraraq onların ölkə xaricinə və ölkə daxilində başqa şəhərlərə yollanmasına qadağa qoydu!

Bilindiyi kimi bir ara çempionluq mübarizəsində ümidlənən İstanbul nəhəngi son 3 turun 2-də ''İstanbulspor'' (3:3) və ''Girəsunspor'' (1:1) kimi zəif rəqibləri məğlub edə bilməyərək yenidən şansını möcüzələrə buraxdı.

Bazar ertəsi başqan Əli Koç komandanın son durumu ilə bağlı Jorje Jezuşla bir neçə saatlıq toplantı keçirdi. Toplantının ardından şəhəri tərk etmək qadağası ilə bağlı xəbər bütün oyunçulara çatdırıldı. Bu üzdən futbolçular 3 gün İstanbulu tərk edə bilmədilər. Bu, komandada heç də birmənalı qarşılanmadı.

"Fənər'' bu gündən etibarən hazırlığı və məşqləri bərpa edəcək.

ƏLİ