“Beşiktaş”la derbidəki tarixi fiaskodan sonra “Fənərbaxça”da hansı dəyişikliklərin baş verəcəyi böyük maraq doğururdu.

"Football-plus.az" xəbər verir ki, fasiləyə üstün yollanmasına və rəqibin 2-ci hissənin əvvəllərində azlıqda qalmasına baxmayaraq, “Fənər” ardıcıl 4 qol buraxmış və yekunda 2:4 hesabı ilə uduzaraq çempionluq yolunda çox mühüm zərbə almışdı. Oyunun sonlarına yaxın Kadıköydə son illərdə eşitməyə adət etdiyimiz təzahürat yenə səsləndirilmiş və Əli Koç istefaya dəvət olunmuşdu. Elə yaxın müddətə qədər fanatların az qala başına and içdiyi baş məşqçi Jorje Jezuş da gözdən düşmüşdü.

Şayiələrə görə derbidən dərhal sonra Koçla Jezuş arasında münaqişə yaşanıb. Oyun günü 56-cı doğum gününü qeyd edən Koç əsəbi şəkildə paltardəyişmə otağına daxil olaraq oyunçuları sərt şəkildə tənqid edib. Onlara atmacalı şəkildə doğum günü hədiyyəsinə görə minnətdarlığını bildirən və məvaciblərinin hər dəfə vaxtında ödənildiyini xatırladan başqan bu camiənin bunları yaşamağa layiq olmadığını bildirib. Bu məqamda Jezuş söhbətə müdaxilə edərək “mənim olduğum yerdə futbolçularımla belə danışmağa haqqınız yoxdu” deyib. Koç isə “mən başqanam və istədiyim yerdə, istədiyim kimi danışa bilərəm” deyərək oranı tərk edib. Portuqaliya mətbuatının iddiasına görə, rəhbərlik təcrübəli mütəxəssisi istefaya göndərməyə hazırlaşırdı və dünənki “Kayserispor”a qarşı oyun Jezuşun bu vəzifədə sonuncu matçı olacaqdı.

Əslində hadisələrin belə axarı heç kimi təəccübləndirməzdi. Çünki Əli Koçun dönəmində indiyə qədər heç bir məşqçi klubda bir mövsüm əvvəldən sona qədər işləməyib! Bundan başqa, 4 futbolçu – Krespo, Sərdar Dursun, İsmayıl Yüksək və Rossinin Jezuşdan rəhbərliyə şikayət etdiyi iddia edilmişdi. Az oynayan bu futbolçuların Jezuş klubda qalacağı təqdirdə yeni müqaviləyə imza atmayacaqları bildirilmişdi. Amma bütün bu şayiələrə baxmayaraq, Jezuş istefaya göndərilmədi. Srağagün Əli Koç “Can Bartu” bazasına gələrək portuqaliyalıyla təkbətək görüş keçirdi.

“Fanatik” nəşrinin yazdığına inansaq, görüş təxminən 3 saata yaxın çəkdi və tərəflər yola davam etmək qərarına gəldilər. Jezuş daha sonra futbolçuları məşqə çıxardı. Məşqi izləyən Koç oyunçularla da toplantı keçirərək onlara güvəndiyini bildirdi. Jezuş hətta Koçla birlikdə yer aldığı şəkli “instaqram” səhifəsində də paylaşdı. Amma böyük ehtimalla 68 yaşlı mütəxəssis mövsümün sonunda komandadan ayrılacaq. Onun müqaviləsinin müddəti onsuz da bu yay bitir və Jezuş tez-tez bu məqamı xatırladır.