''Fənərbaxça''nın yeni baş məşqçisi Jorje Jezuşla bağlı xəbərlər gündəmi zəbt etməkdədi.

"Football-plus.az" xəbər verir ki, İstanbul nəhəngi məşhur portuqaliyalı mütəxəssislə birillik müqavilə imzalayıb. Klubdan verilən açıqlamada onun illik məvacibi 3 milyon avro kimi göstərilib. Amma Portuqaliya mətbuatında tam fərqli rəqəmlər ortada dövr edir. Jezuş rəsmi müqaviləyə imza atandan sonra Portuqaliya mətbuatı onun birillik maaşının 5 milyon, köməkçilərinin maaşının isə 1,5 milyon avroya bərabər olduğunu iddia etdi! Bundan başqa, şayiələrə inansaq, komandanı ÇL-in qrup mərhələsinə daşıyacağı və ən əsası 8 illik çempionluq həsrətinə son qoyacağı təqdirdə 67 yaşlı çalışdırıcı mətbuata açıqlanmayan əlavə bonuslar da qazanacaq. Bu arada Mehmet Aurelionun yenidən ''Fənərbaxça''nın məşqçilər korpusuna daxil ediləcəyi və Jezuşun köməkçilərindən biri olacağı məlum olub. Aurelionun əsas üstünlüyü həm klubu tanıması, həm də portuqalca və türkcə sərbəst danışa bilməsidi. Futbolçu kimi İstanbul nəhənginin əfsanələrindən biri olan və 3 dəfə çempionluq sevinci yaşayan 44 yaşlı Aurelio 2020/21 mövsümündə ''Fənər''də çalışaraq Erol Bulutun köməkçilərindən biri olmuşdu. Jezuşun köməkçiləri arasında həm dietoloq, həm psixoloq, hətta futbolçuların istirahətinə və vaxtında yatmasına görə cavabdehlik daşıyan bir mütəxəssisin də olması diqqəti çəkir.

Türkiyə mətbuatının yazdığına görə Jezuş tərəfindən hər futbolçuya xüsusi məşq proqramı göndərilib. O hər bir oyunçunun iyunun 13-də başlayacaq yeni mövsümün hazırlıq dönəminə hazır gəlməsini istəyir. Məsut Özildən başqa, Ozan Tufan, Tisseran, Mayer və Lemos da portuqaliyalının planlarına daxil deyil. Bu oyunçuların hazırlıq dönəmində komanda ilə birlikdə olmayacağı gözlənilir. Amma Jezuş müqavilə ilə ''Fənər''ə məxsus olsa da, son mövsümü icarə əsasında başqa klublarda keçirən Samatta ilə Kokeri də sınamaq istəyir. Bu iki futbolçu toplanışda iştirak edəcək. Onu da bildirək ki, Jezuş köməkçisi Rodriqo Arauxonun toyunda iştirak etmək üçün dünən vətəninə yollanıb. Onun ən gec cümə axşamı İstanbula qayıdacağı gözlənilir. Artıq qeyd etdiyimiz kimi, komanda hazırlıq dönəminə iyunun 13-də start verəcək. Samandradakı bazada təxminən 3-4 günlük məşq keçdikdən sonra ''Fənər'' ikihəftəlik toplanış üçün ''Topuk Yaylası''na yollanacaq.

ƏLİ