Qış fasiləsindən sonra bu komandalar uğurlu nəticələrlə diqqəti çəkmir.

Xüsusilə də "Zirə" 4 oyunda 1 qələbə, 1 heç-heçə və 2 məğlubiyyətlə yadda qalmışdı. "Qarabağ" isə 8 xal toplamış, son 2 matçda heç-heçələri sıralamışdı. Amma "Gent" üzərində minimalhesablı qələbədən sonra düşərgədə ab-hava yaxşı idi. Komanda Zirəyə də 3 xal üçün gəlsə də, meydan sahibləri ilk dəqiqələrdən son çempiona “dişin göstərməyə” başladı.

Artıq 1-ci dəqiqədə Keyta müdafiəçilərdən sıyrılaraq cərimə meydançasına daxil olub Quqeşaşvilinin sayıqlığını yoxladı. Gürcü yerində idi. Növbəti epizodda Hamdauinin iti bucaq altından həmləsi də nəticəsiz qaldı. Oyun əsasən meydanın mərkəzində getsə də, "qartallar" ehtiyatlı oyunla rəqibi topsuz saxlamağa çalışırdı. Qarşılaşmada erkən qol olmadı. Amma "Qarabağ" tədricən üstünlüyü ələ almağa başladı. Bunun məntiqi nəticəsi kimi 18-ci dəqiqədə Cica reydini Benzyaya ötürmə ilə tamamladı. Amma sonuncunun zərbəsi qeyri-dəqiq alındı. İrəliləyən dəqiqələrdə üstünlüyünü davam etdirən qonaqlar növbəti dəfə qapını yoxladı. Cica bir qərər irəlilədikdən sonra Diakabiyə assistlik etdi, lakin fransalını zərbəsi qapıdan aralı keçdi. Qəsəbə təmsilçisinin növbəti həmləsi isə 31-ci dəqiqədə gerçəkləşdi. Hamdauinin uzun ötürməsini qəbul edən Gerye Diakabini arxada qoyub zərbə vursa da, Quqeşaşvili haitilinin sevinməsinə imkan vermədi. "Köhlən atlar" buna Almeyda – Benzya cütlüyünün təşkil etdiyi hücumla cavab verdi. Amma fransalı hədəfə düşmədi. İlk hissənin son dəqiqəsində isə Hacıağa uzun ötürməylə Keytanı “gördü”. O müdafiəçilərin başını gicəlləndirib əlverişli mövqedə olan Lukoviçə ötürmə versə də, serbiyalı bərbad zərbə vurdu.

İkinci hissəyə "Qarabağ" fəal başladı. 51-ci dəqiqədə Benzya qapını yoxlasa da, Cənnətov topu kornerə çıxardı. Toralın künc nöqtəsindən asması zamanı da Cicanın fərqlənməsinə iki cəhddə topu tutan qapıçı imkan vermədi. İrəliləyən dəqiqələrdə ağdamlılar topa nəzarət edərək, oyunu rəqibin qapısı önündə keçirsə də, qol vəziyyətləri yarada bilmirdi. Rəşad Sadıqovun yetirmələri komanda şəklində yaxşı müdafiə olunurdu. Meydan sahibləri topu ələ keçirən kimi irəlidə fəallığı ilə seçilən Keytaya ötürmə verirdi. Fransalı Rahilə mübarizələrdən qalib çıxsa da, komanda yoldaşlarından dəstək görmədiyindən Quqeşaşvilini sınağa çəkə bilmirdi.

Nəhayət, 88-ci dəqiqədə hesabı açıldı. Leandronun qapı önünə asmasını uzaqlaşdırmaq istəyən Qismət avtoqol müəllifi oldu. “Qaqrabağ” qalan dəqiqələrdə də təşəbbüsü əldən verməyərək hücumlar təşkil etdi. İsmayılın zərbəsi qeyri-dəqiq alındısa da, Leandronun sevinməsinə qolkiper mane oldu. Beləliklə, hakimin final fiti "Qarabağ"ın minimalhesablı qələbəsini rəsmləşdirdi. Ağdamlılar 2 tur sonra qələbə qazandısa, "Zirə" ardıcıl 2-ci məğlubiyyətlə üzləşdi. Ümumiyyətlə, bu komandanın “Qarabağ”la bağlı ciddi kompleksi var. “Zirə” 30 dəfə qarşılaşdığı rəqibi hələ də məğlub edə bilməyib.

Gözdən qaçmadı
* Stadionun tablosunda nə matçın nəticəsi, nə də dəqiqə göstərilirdi. Yalnız fasilədən sonra tablo düzgün işləməyə başladı.
* Xüsusi qonaqlar üçün nəzərdə tutulan lojaya digər sektordan keçid edən oldu. Lakin bir qədər sonra mühafizə xidməti həmin şəxsi ordan uzaqlaşdırdı.
* 37-ci dəqiqədə Toral Bayramov Hacıağa Hacılıya qarşı kobud oynasa da, referi şifahi xəbərdarlıqla kifayətləndi. Bunu görə Rəşad Sadıqov 4-cü hakim Vüqar Həsənliyə yaxınlaşıb "sarı” versə, nə olacaqdı ki” dedi.
* 43-cü dəqiqədə Qismət Cicaya qarşı kobud oynayarkən "Qarabağ"ın ehtiyat oyunçular skamyasında əyləşən Veşoviç yerindən sıçrayaraq hakimə etiraz etdi.

ABDULLA İSMAYILOĞLU