“Kəpəz” Qəbələyə ümidli gəlmişdi. "Sabah"dan alınacaq 1 xal gəncəlilərin premyer-liqada qalmaq şansını artıracaqdı. Lakin bu istəyi həyata keçirmək o qədər də asan görünmürdü.

Elə matçın əvvəlindəcə "sarı-göylər"in ümidləri puç oldu. 4-cü dəqiqədə "bayquşlar"ın əsas ulduzu Kaşuk hesabı açdı. Qoldan sonra "Kəpəz" bakılılara təzyiq göstərə bilmədi. Masazır klubu bundan da rahat istifadə etdi. 16-cı dəqiqədə yenə Kaşuk səhnəyə çıxdı. Onun künc nöqtəsindən asmasını Apeh qola çevirdi.

Bundan sonra "Sabah"ın futbolçuları rahatlaşdı. Əsasən də müdafiədə Amin sürətli Martinslə Şuaybuya qarşı əziyyət çəkirdi. Lakin gəncəlilərin hücum xəttində yer alan oyunçuların son zərbələri dəqiq olmurdu. Uzun müddətdən sonra əsas heyətdə meydana çıxan Nicat Mehbalıyev həyəcanlı olsa da, səhvə yol vermirdi. Nəticədə fasiləyə kimi gəncəlilərin qol istəyi reallaşmadı.

İkinci hissədə "sarı-göylər" böyük qüvvə ilə "Sabah"ın müdafiəsini təzyiq altında saxladı. Lakin gəncəlilərdə yenə dəqiqlik çatmırdı. Buna baxmayaraq, "Kəpəz" 53-cü dəqiqədə "Sabah"ın qapısına yol tapdı. Xvalkonun cərimə zərbəsindən ötürülən topu qapıya göndərməsinə Nicat mane olmağa çalışdı. "Dəri kürə" xətti keçsə də, hakim mərkəzi göstərmədi. Epizodun təkrarında da gəncəlilərin “təmiz” qol vurduğu göründü. Amma yenə VAR-da oturanlar prosesi dəqiq dəyərləndirə bilmədi. Hətta qarşılaşmanın şərhçisi Rüstəm Əfsərli belə "CBC Sport"un efirində topun xətti tam keçdiyini dilə gətirdi.

Bu epizoddan sonra gəncəlilərin təzyiqi azaldı. "Sabah"ın məşqçilər heyəti də dəyişikliklər edərək topa nəzarəti ələ aldı. Son dəqiqələrdə "bayquşlar" "sarı-göylər"i tam öz qapısına doğru sıxışdırmışdı. Qarşlılaşmada son nöqtəni Volkov qoydu. Gürcüstanlı forvard 83-cü dəqiqədə İldarın ideal ötürməsini qola çevirdi. Beləliklə, Masazır klubu Qəbələdə "Kəpəz"i 3:0 hesabıyla məğlub edərək "Qarabağ"la xal fərqini yenə 4-ə endirdi.

Gözdən qaçmadı
* Oyunun başlamısına 3-4 dəqiqə qalmış "Sabah"ın azarkeşləri stadiona daxil oldu. Onlar polislər tərəfindən bir-bir yoxlanıldıqdan sonra tribunada yerini tutdu.
* İkinci hissədə oyunu protokol tribunasından izləyən Murad Musayevlə gəncəli azarkeşlər arasında mübahisə düşdü. Rusiyalı mütəxəssis Nicatın səhv ötürməsinə əsəbləşib öz dilində söyüş söydü. "Kəpəz"in yaşlı azarkeşlərindən biri isə buna sərt reaksiya verdi: "Sən normal məşqçi olsan, ordan oyunu izləməzdin. Ayıbdı, niyə söyüş söyürsən?" Musayevin cavabı da sərt oldu: "Oyun meydandadı, bura nə baxırsız? Görüşü izləyin".
* Qarşılaşma bitəndən sonra Murad Musayev azarkeşlərlə sakit tərzdə söhbətləşdi. Rusiyalı yenə hakimlərə ilişdi: "Azərbaycanlı referilərin idarəçiyi pis gündədi. Sizin "Sumqayıt"la oyununzda təmiz ofsayd var idi. Amma hakim qol saydı". Azarkeşlərdən biri "var ol, kişi adamsan!" deyərək söhbəti yekunlaşdırdı.
* Hakimin final fitindən sonra "Sabah"ın qapıçılar üzrə məşqçisi Vitali Kovalyov meydana daxil olaraq futbolçularla bir-bir görüşərək təbrik etdi. Maraq üçün qeyd edək ki, mütəxəssis ötən tur "Şamaxı" ilə oyunda qırmızı vərəqə almışdı.
* Tərlan Əhmədov mətbuat konfransından sonra atası vəfat edən həmkarımız Mirağa Mirzəyevə başsağlığı verdi.
* Oyundan sonra jurnalistlər Nicat Mehbalıyevdən müsahibə götürürdü. Bu zaman arenanı tərk edən Murad Musayev həmkarımız Elsəvər Muradzadə ilə "bu da Nicat, axır ki meydana çıxdı", - deyə zarafat etdi.

İLKİN SULTANLI