İlk hissəyə baxanlar deyə bilərdi ki, qarşılaşma 1:0 və 2:0 hesabı ilə “Neftçi”nin xeyrinə bitəcək.

Lakin 90 dəqiqə ərzində flaqmanın üstünlüyü o qədər də hiss olunmadı. Qeyd ediyimiz kimi, “ağ-qaralar” keyfiyyətli oyunçularının sayəsində “Kəpəz”in müdafiəçilərini çaş-baş salmışdı. Gəncəlilərin hücum xəttində yer alan futbolçular da “Neftçi”nin müdafiəçilərini tez-tez narahat edirdi. Lakin cəhdlərə baxmayaraq, heç bir komanda ilk 45 dəqiqədə fərqlənə bilmədi.

Fasilədən sonra isə “Kəpəz” daha baxımlı oyun sərgiləməyə başladı. “Sarı-göylər” ciddi təhlükə yaratmasa da, flaqmanı qapısına sıxışdırmışdı. Bu da faydasını 57-ci dəqiqədə verdi. Yusif gözlənilməz zərbə ilə hesabı açdı. Bu top sanki “Neftçi”ni qəflət yuxusundan oyatdı. Flaqmanın heyətində ən yaxşı olan Emin 65-ci dəqiqədə hesabı bərabərləşdirdi. 7 dəqiqə sonra isə kapitanın künc zərbəsindən ötürdüyü topu Eddi başla qapıya göndərdi. Hamı “Neftçi”dən 3-cü qolu gözlədiyi vaxtda Sisse gəncəlilərə “mən burdayam” mesajını verdi. Hücumçu 1 dəqiqə sonra hesabı bərabərləşdirdi. Bundan sonra Tərlan Əhmədovun komandası ancaq müdafiə haqda düşündü. Bakılılar isə hücumda vaxt keçirirdi. Hətta Yeqor komandasını önə keçirsə də, oyundankənar vəziyyət qeydə alındı. Lakin bu qərar səhv idi. Təkrara baxanda qolun qaydalar çərçivəsində vurulduğunu və hakimlər briqadasının səhvə yol verdiyini söyləmək olar. “Neftçi” gümüş medal uğrunda mübarizədə ciddi zərbə alsa da, “Kəpəz” premyer-liqada qalmaq yarışında çox vacib 1 xal əldə etdi.

Gözdən qaçmadı
* “Kəpəz”in azarkeşlərinin matça gec gəlməsi diqqəti çəkdi.
* İkinci hissə 2 dəqiqə gec başladı. Buna səbəb Yusif Nəbiyevin formasının olmaması idi. Hətta Elçin Məsiyev görüş daha da gecikməsin deyə, qarşılaşmanı “Kəpəz”in kapitanı meydanda olmadan başlatdı.
* Yeqor Boqomolskinin ofsayd üzündən qeydə alınmayan qolu zamanı Regekampf klubun Media, Marketinq və İctimaiyyətlə Əlaqələr Departamentinin rəhbəri Rüstəm Allahverdiyevi çağıraraq epizodun təkrarına baxıb-baxmadığını soruşdu. Bu zaman “Neftçi”nin ehtiyat oyunçular skamyasının arxasında əyləşən azarkeşlər qol olduğunu dilə gətirdilər.
* Matç bitən kimi Regekampf Elçin Məsiyevin yanına yollandı. Rumın mütəxəssis hakimlə müzakirə edəndən, futbolçuları dövrəyə alıb məsləhətlərini verəndən sonra “Kəpəz”in çalışdırıcısı Tərlan Əhmədovla görüşdü.

İLKİN SULTANLI