Konfrans Liqasına vəsiqə qazanmağı ən azı “Sabah” qədər arzulayan “Zirə” üçün indi əsas hədəf ilk “4-lük”də yerini əldən verməməkdi.

Qələbənin əhəmiyyəti böyük olduğundan komandalar oyuna ehtiyatlı başladı. Debütdə mübarizə əsasən mərkəzdə getsə də, tədricən qonaqların müəyyən üstünlüyü hiss olunmağa başladı. Amma qapıya ilk zərbə “qartallar”dan, daha dəqiqi, Keytadan gəldi. “Bayquşlar"ın cavabı da gecikmədi. Namikin ötürməsindən sonra Mikelsin zərbəsini qapıçı dəf etdi. Qəsəbə təmsilçisinin heyətində Lukoviçlə Keyta fəal idi. "Sabah"da isə Elvin orta sahədəki dağıdıcılığı, Kaşuk, İsayev, Mikels yaradıcılığıyla diqqəti çəkirdi. 38-ci dəqiqədə gözəl ara ötürməsiylə Rəhimi qapıçıyla üz-üzə qoydu. Yığma üzvü topu tora qovuşdursa da, hakim ofsayd qeydə aldı. 45-ci dəqiqədə Lukoviçin kornerdən qapı önünə asmasına Çantakias zərbə endirsə də, müdafiəçi qola imkan vermədi. Bu ilk yarıda sonuncu təhlükəli vəziyyət oldu.

2-ci hissəyə "Sabah" daha fəal başladı və bunun bəhrəsini tezliklə gördü. 52-ci dəqiqədə Mikelsin zərbəsi dirəkdən qayıtdı, müdafiəçiləri qabaqlayan Volkov isə təkrar zərbəylə hesabı açdı. Qoldan sonra da "bayquşlar" təşəbüssü əldən vermədi. 62-ci dəqiqədə oyunun taleyi həll olundu. Volkov – Kaşuk – Mikels “üçlüy”ünün qurduğu hücumu almaniyalı dəqiq zərbəylə bitirdi. Bundan sonra "Zirə" üstünlüyü ələ alıb hücumlara çıxsa da, rəqibin qapısı önündə qol vəziyyətləti yarada bilmədi. Beləliklə, evdə acı məğlubiyyətlə üzləşən “qartallar” “Qəbələ”nin uğursuzluğunu arzulamaqdan başqa yolu qalmadı.

Gözdən qaçmadı

* 38-ci dəqiqədə Rəhim Sadıxov fərqlənərkən hakim ofsayd qeydə aldı. Amma stadionun diktoru qolu elan etdi.
* Kulaç 80-ci dəqiqədə Eldar Quliyevi əvəzləməklə "Zirə"də debüt etdi.