Həm həftəsonu, həm də rəqibin “Qarabağ” olması gəncəlilərin oyuna marağını artırmışdı.

Football-plus.az xəbər verir ki, onlar matçdan öncə “Kəpəz”in liderdən xal alacağına inanırdı. Qarşılaşmaya da məhz “sarı-göylər” istəkli başladı. Juniorla Şuaybu ilk dəqiqələrdən “Qarabağ”ın mərkəz müdafiəçiləri Bəhlulla Medinaya başağrı olurdu. Yusif də “Kəpəz”in heyətində əsl kapitan kimi mübarizə aparırdı. Ümumiyyətlə, ilk 15 dəqiqədə gəncəlilər üstün oyun sərgilədi. Sadəcə, son nöqtəni qoymaq mümkün olmadı. 24-cü dəqiqədə isə “Qarabağ” təcrübəsindən istifadə etdi. Maksimin sağ cinahdan cərimə meydançasına ideal asmasını Musa başla tamamladı. Qoldan sonra Tərlan Əhmədovun komandası daha istəkli görünsə də, bütün cəhdlərə baxmayaraq, fasiləyə kimi fərqlənə bilmədi.

İkinci hissəyə də meydan sahibləri üstün başladı. Juniorla Şuaybu “Qarabağ” müdafiəçilərini yorulmağa məcbur edirdi. Mərkəzdə isə Ayzaya şou göstərirdi. 49-cü dəqiqədə gəncəlilər hesabı bərabərləşdirdi. Elə Ayzaya cərimə meydançasının qövsü üzərindən zərbə ilə Amini cəzalandırdı. Qurban Qurbanov durumu dəyişmək üçün üç dəyişiklik etdi. Lakin bu da ağdamlıların fərqlənməsinə kömək olmadı. İki-üç epizodda isə Orxan əla seyvlə komandasını qoldan xilas etdi. Gəncəlilər əks-hücumlara belə bağlamışdı. Bu bəzən alınsa da, Medina çox vaxt keçilməz sədd rolunu oynayırdı. Beləliklə, lider “Qarabağ” autsayder “Kəpəz”lə oyunda büdrədi. Çoxları “köhlən atlar”ın Gəncədən rahat qələbə ilə qayıdacağını gözləsə də, ağdamlılar 1 xalla kifayətləndi. Çempionatda “Sabah”, Konfrans Liqasında “Gent” ilə oyunlar ərəfəsində “Qarabağ” heç də ideal vəziyyətdə deyil.

Gözdən qaçmadı
* Hakimin start fitindən öncə Vətən müharibəsi zamanı ermənilərin Gəncəyə raket zərbəsindən zərər çəkən uşaqlar meydana daxil oldu. Onlar “Qarabağ”ın baş məşqçisi Qurban Qurbanova gül dəstəsi təqdim etdi. Uşaqlar bununla 51 yaşlı mütəxəssisə təşəkkürlərini bildirdi. Bir müddət əvvəl mütəxəssis uşaqlara oyuncaq hədiyyə göndərib.
* Protokolda 2500 azarkeşin oyunu izlədiyi yazılıb. Lakin stadionda 3500-dən çox adam var idi.
* Qurban Qurbanov oyunun sonlarında ardıcıl iki səhv edən Yankoviçə əsəbləşdi. Baş məşqçi yarımmüdafiəçiyə komandanın qol vurmağa tələsdiyini, dəqiq oynamağın lazım olduğunu bildirdi.

İLKİN SULTANLI