Premyer-liqada daha bir oyun həftəsini geridə qoyduq. Azarkeşlər 32-ci turda bir-birindən maraqlı, prinsipial qarşılaşmalara şahidlik etdi.

“Kəpəz” Qəbələdə “Sumqayıt”ı sınağa çəkdi. Qarşılıqlı hücumlar şəraitində keçən matçın taleyini bir qol həll etdi. “Kimyaçılar” Vüsal İsgəndərlinin ikinci yarıda vurduğu qol sayəsində evə əlidolu dönməyi bacardı. Qazanılan 3 xal Samir Abasovunı komandasının turnir vəziyyətinə təsir etməsə də, sumqayıtlılar son pillədə qərarlaşan “Şamaxı” və “Səbail”dən bir qədər də uzaqlaşdı ki, bu da elitada qalmaq yönündə önəmli addım kimi dəyərləndirilə bilər.

9-ci pillədə qərarlaşan, premyer-liqanın tərk etmək təhlükəsi ilə üz-üzə qalan “Şamaxı” üçün 32-ci tur qanqaraldıcı oldu. Masazırda “Sabah”la üz-üzə gələn “şirlər” çox çalışsa da, azarkeşlərini sevindirə bilmədi. Bu yay ölkəmizi Konfrans Liqasında təmsil edəcəyi dəqiqləşən “tələbələr” minimalhesablı qələbə ilə mövsümdə 23-cü zəfərini rəsmiləşdirdi.

Kubokun yarımfinalının hər iki matçında “Səbail”dən üstün olan “Qəbələ” çempionat görüşündə də “dənizçilər”i “ağ bayraq qaldırmağa” məcbur etdi. Qonaqların çalışdırıcısı Şahin Diniyev növbəti dəfə komandasının oyunundan və ortaya qoyduğu xarakterdən razı qaldığını söyləsə də, real durum odu ki, “Səbail” sonuncu pillədədi.

Turun ən gözlənilməz nəticəsi Zirədə qeydə alındı desək, yanılmarıq. Əvvəlki 3 görüşdə “boz qurd”dan üstün olan “qartallar” öz meydanında yenilməklə avrokuboka vəsiqə uğrunda mübarizədə ağır zərbə aldı. Rəşad Sadıqovun komandası 4-cü pillədə qərarlaşan “Qəbələ”dən 6 xal geri qalır ki, qarşıdakı turlarda bunu aradan qaldırmaq çətin olacaq. Artıq qəsəbə təmsilçisinin taleyi öz əlində deyil. “Zirə” qarşıdakı 4 turda “Qəbələ”nin büdrəməsini arzulamaqla yanaşı, bütün matçlarda meydanı 3 xalla tərk etmək məcburiyyətindədi.

Və nəhayət, 7 min azarkeşin stadiondan canlı, yüzminlərlə futbolsevərin mavi ekrandan izlədiyi Azərbaycan derbisi! “Neftçi”ylə “Qarabağ” arasında baş tutan bütün görüşlər ajiotaj doğurur. Bu dəfə də istisna olmadı. Tribunalar tam dolmasa da, buna yaxın idi. Açığı, ab-havaya uyğun da 90 dəqiqə alındı. Oyuna daha fəal başlayan “Qarabağ” 2 top fərqi ilə irəli çıxsa da, azlıqda qalan meydan sahibləri həvəsdən düşmədi və hissənin sonuna 5 dəqiqə qalmış hesab arasında fərqi azaltdı. Ancaq ikinci yarıda “Qarabağ” sürəti bir qədər də artırınca, meydan sahibləri mövsümdə 3-cü dəfə təslim aktina qol çəkməyə məcbur oldu. Bu görüşdən sonra həm də “Neftçi”nin mövsümü “bürünc”lə bitirəcəyi dəqiqləşdi.

Musa Qurbanlı cəza səbəbindən “Neftçi” ilə oyunu buraxsa da, əvvəlki kimi bombardirlər yarışında ilk pillədədi. Onun komanda yoldaşı Ramil Şeydayev isə “ağ-qaralar”la görüşdə fərqlənməklə yarışdan qopmadığını ortaya qoydu.

Misli premyer-liqası
4-cü dövrə, 32 tur
29 aprel
Kəpəz – Sumqayıt 0:1
Sabah – Şamaxı 1:0
1 may
Qəbələ - Səbail 4:2
Zirə - Turan Tovuz 1:3
2 may
Neftçi – Qarabağ 2:4

1. Qarabağ 32 25 6 1 81-22 81
2. Sabah 32 23 5 4 68-23 74
3. Neftçi 32 18 7 7 58-32 61
4. Qəbələ 32 13 9 10 45-41 48
5. Zirə 32 11 9 12 38-45 42
6. Turan Tovuz 32 8 8 16 27-43 32
7. Kəpəz 32 6 11 15 31-54 29
8. Sumqayıt 32 7 7 18 23-59 28
9. Şamaxı 32 4 11 17 25-47 23
10. Səbail 32 5 7 20 26-56 22

Bombardirlər: Musa Qurbanlı (Qarabağ) – 20, Ramil Şeydayev (Qarabağ) – 19, Coy-Lens Mikels (Sabah) – 17, Emin Mahmudov (Neftçi) – 16, Aleksey Kaşuk (Sabah) – 15.

Növbəti turun oyunları: 5 may – Kəpəz – Sabah; 6 may – Şamaxı – Zirə; 7 may – Sumqayıt – Səbail, Turan Tovuz – Neftçi; 8 may – Qarabağ – Qəbələ.

RƏŞAD