Həftəsonu keçirilən matçlarla Misli premyer-liqasında 9-cu turla yanaşı, birinci dövrəyə də yekun vuruldu. Hesabat turu qol baxımından “qısır” oldu. 5 oyunda qapılara cəmi 8 qol vuruldu ki, bunun da 5-i bir matça təsadüf etdi.
Turun mərkəzi qarşılaşması Qəbələdə keçirildi. Bölgənin eyniadlı komandası “Qarabağ”ı qonaq edirdi. Matçın ilk yarısında qapılar önündə təhlükəli vəziyyətlər yaşanmadı. İlk yarının sonuna yaxın “Qəbələ”nin azlıqda qalması oyunun sonrakı axarına ciddi təsir göstərdi. Fasilədən sonra meydanda diqtə edən tərəf ağdamlılar oldu ki, bunun da məntiqi nəticəsi kimi Qurban Qurbanovun komandası qələbə topunu vurdu. Bu yerdə azlıqda qalmasına, hesabda geri düşməsinə baxmayaraq, Elmar Baxşıyevin yetirmələrinin ruhdan düşməyərək hesabı bərabərləşdirmək üçün sona qədər mübarizə aparmasını qeyd etmək lazımdı.
Masazırda azarkeşlər məhsuldar oyuna şahidlik etdi. Medallar uğrunda mübarizə aparan “Sabah” “Kəpəz”i darmadağın etdi. Matçın taleyi artıq 1-ci hissədə həll olundu. Meydan sahibləri fasiləyə qədər “sarı-göylər”i 3 dəfə meydanın mərkəzinə dəvət etdi. İkinci hissədə də sürəti aşağı salmayan “tələbələr” daha 2 dəfə fərqlənməklə Tərlan Əhmədova və komandasına unuda bilməyəcəkləri məğlubiyyət yaşatdı.
Görüşdən əvvəl “Turan Tovuz”un “Neftçi”dən xal alacağını bəlkə də heç kim gözləmirdi. Heyət baxımından “ağ-qaralar” qonaqlardan dəfələrlə üstündü desək, yanılmarıq. Ancaq Ayxan Abbasov artıq neçənci dəfədi ölkənin ən köklü komandasını “sancmağı” bacarır. Yarızarafat, yarıciddi, Abbasovu “Neftçi”nin qatili kimi də təqdim etmək olar. 41 yaşlı mütəxəssis “Sumqayıt”da işlədiyi dönəmdə də “ağ-qaralar”ın qəniminə çevrilmişdi. “Neftçi” “kimyaçılar”la görüşlərdə daim əziyyət çəkirdi. Abbasov bu dəfə “Turan Tovuz”un “sükanı arxasında” Bakıda “ağ-qaralar”dan xal almağı bacardı.
Turun açılış oyununda isə “Zirə” öz meydanında çempionatın aşkar autsayderi “Şamaxı” ilə üz-üzə gəldi. Ötən tur Tovuzdan 3 xalla dönən “qartallar”ın bölgə təmsilçisindən üstün olacağı heç kimdə şübhə doğurmurdu. Qonaqlar çox çalışsa da, sona qədər qapısının toxunulmazlığını qoruya bilmədi.
“Sumqayıt”ın isə qələbəsiz seriyası davam edir. Samir Abasovun gəlişi belə “kimyaçılar”ın dərdinə çarə olmayıb. “Gənclik şəhəri”nin təmsilçisi bu dəfə “Səbail”in qonağı idi və minimal hesabla yenildi. Komandanın oyununda inkişaf sezilsə də, görünür, bu hələ qələbə üçün yetərli deyil. Baş məşqçi özü də etiraf edir ki, hələ çox iş görməlidi. “Dənizçilər” isə mövsümdə ikinci qələbə sayəsində autsayderlər qrupundan uzaqlaşdı.
Misli premyer-liqası
1-ci dövrə, 9-cu tur
7 oktyabr
Zirə - Şamaxı 1:0
8 oktyabr
Səbail – Sumqayıt 1:0
Neftçi – Turan Tovuz 0:0
9 oktyabr
Qəbələ - Qarabağ 0:1
Sabah – Kəpəz 5:0
1. Qarabağ 8 8 0 0 25-6 24
2. Sabah 9 7 1 1 22-7 22
3. Neftçi 9 6 1 2 17-9 19
4. Zirə 9 5 1 3 13-16 16
5. Qəbələ 9 5 0 4 13-9 15
6. Turan Tovuz 8 3 2 3 6-8 11
7. Səbail 9 2 2 5 9-12 8
8. Kəpəz 9 1 1 7 6-23 4
9. Sumqayıt 9 0 4 5 1-11 4
10. Şamaxı 9 0 2 7 4-15 2
Bombardirlər: Ramil Şeydayev, Musa Qurbanlı (hər ikisi "Qarabağ") – 7, Coy-Lens Mikels (Sabah) – 6, Runi Eva (Turan Tovuz), Ağabala Ramazanov (Səbail) – 4.
Növbəti turun oyunları: 14 oktyabr – Şamaxı – Qəbələ; 15 oktyabr – Turan Tovuz – Səbail, Sabah – Zirə; 16 oktyabr – Kəpəz – Neftçi, Qarabağ – Sumqayıt.
RƏŞAD