Premyer-liqanın 26-cı turundan sonra turnir cədvəlinin nə ilk “üçlüy”ündə, nə də aşağı pillələrində dəyişiklik oldu.

Lider “Qarabağ” hesabat turunda “Səbail”i qəbul etdi. Qurban Qurbanovun komandası çətinlik çəkmədən autsayderi evə əliboş yola saldı. Meydan sahibləri matçın taleyini, demək olar ki, ilk yarıda vurduğu iki qolla həll etməyi bacardı. “Köhlən atlar”ın ən sərrast iki futbolçusundan biri olan Musa Qurbanlı isə “dənizçilər”lə görüşdə adını tabloya yazdırmaqla 26 turdan sonra bombardirlərin yarışında hamıya yuxarıdan aşağı baxır. Musanın ən yaxın iləyicisi və komanda yoldaşı Ramil Şeydayev ondan bir qol az vurub.

Ağdam təmsilçisinin ən yaxın izləyicisi də həftəni qələbə ilə başa vurdu. “Sabah” “Sumqayıt” üzərində böyükhesablı qələbə ilə mövsümdə 18-ci dəfə meydanı 3 xalla tərk etdi. İnsaf naminə onu da qeyd etmək yerinə düşər ki, “kimyaçılar” Masazırda heç də acı yenilgiyə layiq deyildi. Sadəcə, qonaqlar əlinə düşən real epizodları boşa verdiyi halda, Murad Musayevin baş məşqçisi olduğu kollektiv yarımqol epizodundan belə maksimum yararlandı. “Tələbələr” qələbə sayəsində “Qarabağ”la xal fərqini qorudu.

İlk “üçlüy”ün sonuncu nümayəndəsi “Neftçi” də 26-cı həftədə azarkeşlərinə qələbə sevinci yaşatdı. Düzdü, “ağ-qaralar” “Qarabağ” və “Sabah”dan fərqli hesabına 3 xal yazdırmaq üçün “Şamaxı” ilə görüşdə çox tər tökməli oldu. Ancaq istənilən halda, bakılılar parlaq oyunla olmasa belə, evə əlidolu döndü ki, bunu da Regekampfın komandasının adına uğur kimi qələmə vermək lazımdı. “Şamaxı”ya gəlincə, meydan sahibləri “Neftçi” ilə matçda, xüsusilə də ilk hissədə sərgilədikləri oyunla heç də məğlubiyyətə layiq deyildi. Birinci hissədə real qol şanslarını qaçıran “şirlər”ə millinin baş məşqçisi Canni de Byazinin də canlı izlədiyi qarşılaşmada Rəşad Əzizlinin 81-ci dəqiqədə yol verdiyi yeganə səhv baha başa gəldi.
Autsayderlər arasında yer alan “Kəpəz” ev oyununda qələbəyə yaxın olsa da, “Zirə” son dəqiqələrdə məğlubiyyətdən qaça bildi. Gəncə klubunu hazırda düşmə zonasından 4 xal ayırsa da, qara buludların Tərlan Əhmədovun komandasının başının üstündən çəkildiyini demək olmaz. Növbəti turda “sarı-göylər”i səfərdə “Neftçi” ilə çətin oyun gözləyir.

Turnir cədvəlində qonşu pilllələrdə qərarlaşan iki komandanın oyununda isə qalib müəyyənləşmədi. “Turan Tovuz” “Qəbələ” ilə görüşdə hesabda önə çıxmasına baxmayaraq, “qırmızı-qaralar” elə ilk hissədə buraxılan qolun əvəzini çıxmaqla çətin Tovuz səfərindən 1 xalla döndü.

Misli premyer-liqası
3-cü dövrə, 26-cı tur
10 mart
Kəpəz – Zirə 1:1
Sabah – Sumqayıt 4:0
11 mart
Turan Tovuz – Qəbələ 1:1
Qarabağ – Səbail 3:0
12 mart
Şamaxı – Neftçi 0:1

1. Qarabağ 26 21 5 0 64-15 68
2. Sabah 26 18 5 3 57-18 59
3. Neftçi 26 17 4 5 47-22 55
4. Zirə 26 10 7 9 30-34 37
5. Qəbələ 26 8 9 9 30-32 33
6. Turan Tovuz 26 7 6 13 20-34 27
7. Sumqayıt 26 5 6 15 17-44 21
8. Kəpəz 26 4 9 13 25-47 21
9. Şamaxı 26 4 8 14 23-41 20
10. Səbail 26 4 5 17 19-45 17

Bombardirlər: Musa Qurbanlı (Qarabağ) – 18, Ramil Şeydayev (Qarabağ) – 17, Emin Mahmudov (Neftçi), Coy-Lens Mikels (Sabah) – 13, Aleksey Kaşuk (Sabah) – 11.
Növbəti turun oyunları: 15 mart – Sumqayıt – Qarabağ, Zirə - Sabah; 16 mart – Səbail – Turan Tovuz, Neftçi – Kəpəz; 17 mart – Qəbələ - Şamaxı.