Yığmanın oyunları ilə bağlı çempionatda yaranan fasilə ərəfəsində premyer-liqada 27-ci turun görüşləri keçirildi.

Turun ilk qarşılaşmasında azarkeşlər çoxlu qol izlədi. Sumqayıta səfər edən “Qarabağ” turnir cədvəlinin aşağılarında qərarlaşan şəhərin eyniadlı komandasını darmadağın etdi. “Kapital Bank Arena”da sanki məşq edən “köhlən atlar” “kimyaçılar”a əsl futbol dərsi keçdi. Zibir – Andrade - Qurbanlı “üçlüy”ü artıq ilk yarıda 4 qol vurmaqla görüşün taleyini həll etdi. Dublla yadda qalan Musa isə artıq 20 qol həddinə çatıb. Həmin gün doğum gününü qeyd edən Ramil Şeydayev, çox çalışsa da, fərqlənə bilmədi. Millinin forfardı 27 turdan sonra bombardirlər yarışında komanda yoldaşından 3 top geri qalır.

Turun maraqla gözlənilən oyunlarından biri də Zirədə keçirildi. Qarşısına Konfrans Liqasına yollanmaq məqsədi qoyan “Zirə” “Sabah”ı qonaq edirdi. İlk yarısı bərabər səviyyədə keçən matçda əsas hadisələr ikinci hissədə yaşandı. İlk 45 dəqiqədə yetərincə xoş təsir bağışlayan “qartallar”a fasilədən sonra sanki “dayan” komandası verildi. Qəsəbə təmsilçisi çətinliklə meydanın mərkəzini keçsə də, çox asanlıqla topu rəqibə verirdi. “Tələbələr” bir qədər sürəti artırınca istədiyinə nail oldu. Murad Musayevin komandası 10 dəqiqə aralığında vurduğu iki qolla oyunun taleyini həll etdi. Bu məğlubiyyətdən sonra artıq “qartallar”ın mövsümü 4-cü pillədə başa vuracağı bir qədər qaranlıq görünür.

Bir gün əvvəl “Sumqayıt” uduzduğundan “Səbail” “Turan Tovuz”la oyuna qələbə əzmi ilə çıxmışdı. “Dənizçilər” qonaqları yenəcəyi halda “kimyaçılar”la xal fərqini minimuma endirə bilərdi. Ancaq Şahin Diniyevin çalışdırdığı komanda şansdan yararlana bilmədi. Düzdü, oyun meydan sahibləri üçün yaxşı başladı. “Səbail” hesabda önə çıxa bildi. Ancaq qonaqlar çox keçmədən “status-kvo”nu bərpa etməklə “ASCO Arena”dan 1 xal apara bildi. Son pillədə qərarlaşan “Səbail”in isə “qara günləri” davam edir.

Turun ən böyük sürprizi “Bakcell Arena”da yaşandı. Autsayderlər arasında qərarlaşan “Kəpəz” “Neftçi”dən xal qoparmaqla çoxlarını təəccübləndirdi. Dramatik alınan 90 dəqiqədə azarkeşlər son saniyəyə kimi maraqlı, prinsipial oyun izlədi. Gəncə klubu “ağ-qaralar”la görüşdə onları siyahıdan silməyin tez olduğunu bir daha nümayiş etdirdi. Tərlan Əhmədov və futbolçular qarşıdakı matçlarda da eyni əzmkarlığı və istəyi ortaya qoya bilsə, “Kəpəz” növbəti mövsümdə də elitada çıxış edəcək komandalar arasında olacaq.

Turun son oyunu Böyük Qafqazın ətəyində yerləşən Qəbələdə keçirildi. Yerli komanda “Şamaxı” ilə üz-üzə gəldi. Güclü yağış altında keçən oyunun ilk dəqiqələri qarşılıqlı hücumlarla müşayiət olunsa da, daha təcrübəli “qırmızı-qaralar” fasiləyə qədər 2 qol vurmaqla, demək olar, intriqanı öldürdü. İkinci yarıda başqa qol olmadığından meydan sahibləri mövsümdə 9-cu qələbəsini rəsmiləşdirdi. Artıq “Qəbələ”ni 4-cü pillədə qərarlaşan “Zirə”dən cəmi 1 xal ayırır.

Misli premyer-liqası
3-cü dövrə, 27-ci tur
15 mart
Sumqayıt – Qarabağ 0:6
Zirə - Sabah 0:2
16 mart
Səbail – Turan Tovuz 1:1
Neftçi – Kəpəz 2:2
17 mart
Qəbələ - Şamaxı 2:0

1. Qarabağ 27 22 5 0 70-15 71
2. Sabah 27 19 5 3 59-18 62
3. Neftçi 27 17 5 5 49-24 56
4. Zirə 27 10 7 10 30-36 37
5. Qəbələ 27 9 9 9 32-32 36
6. Turan Tovuz 27 7 7 13 21-35 28
7. Kəpəz 27 4 10 13 27-49 22
8. Sumqayıt 27 5 6 16 17-50 21
9. Şamaxı 27 4 8 15 23-43 20
10. Səbail 27 4 6 17 20-46 18
Bombardirlər: Musa Qurbanlı (Qarabağ) – 20, Ramil Şeydayev (Qarabağ) – 17, Coy-Lens Mikels (Sabah), Emin Mahmudov (Neftçi) – 14.
Növbəti turun oyunları: 31 mart – Turan Tovuz – Sumqayıt; 1 aprel – Kəpəz – Səbail, Zirə - Neftçi; 2 aprel – Şamaxı – Qarabağ, Sabah – Qəbələ.

RƏŞAD