Premyer-liqada daha bir turu geridə geridə qoyduq.

28-ci oyun həftəsində Şamaxıya səfər edən “Qarabağ” bəlkə də o qədər parlaq oyun ortaya qoymasa da, vacib olan növbəti 3 xalı hesabına yazdı. Bu qələbə sayəsində “köhlən atlar” lider mövqeyini bir qədər bərkitdi. “Şirlər” isə təhlükəli zonada qərarlaşıb. Bölgə təmsilçisi son pillədə “lövbər salan” “Səbail”i cəmi 2 xal qabaqlayır ki, qarşıda 8 turun qaldığını nəzərə alsaq, bu o qədər də böyük fərq sayılmamalıdı.

“Səbail”dən söz demişkən, “dənizçilər” Gəncədə “Kəpəz”ə yenilməklə mövsümdə 18-ci dəfə meydanı məyus tərk etdi. Görünür, təcrübəli Şahin Diniyev də komandanı toparlamaqda çətinlik çəkir. Belə davam edəcəyi təqdirdə normal infrastruktura, sabit maliyyə dayağına malik klub növbəti mövsümə birinci divizionda başlayacaq. Ancaq hələ heç nə itirilməyib. Komanda qarşıdakı turlarda toparlanıb təhlükəli zonadan uzaqlaşa bilər. “Kəpəz” isə problemlər məngənəsində sıxılmasına baxmayaraq, azarkeşlərini sevindirməkdə davam edir. Ötən tur “Neftçi”dən xal qoparan “sarı-göylər” 6-cı pillədə qərarlaşan “Turan Tovuz”dan cəmi 3 xal geri qalır. Tərlan Əhmədov isə növbəti dəfə minimum şərtlərlə maksimum nəticə qazanmağı bacaran məşqçi olduğunu sübut etməkdədi.

Hesabat turu “Sumqayıt” üçün də düşərli oldu. Turnir cədvəlinin alt sıralarında məskunlaşan “kimyaçılar” üçün Tovuz səfəri böyük önəm daşıyırdı. Məğlub olacağı halda Samir Abasovun komandası turnir cədvəlində vəziyyətini ağırlaşdırmaqla yanaşı, psixoloji cəhətdən də ağır zərbə alacaqdı. Bəlkə də tovuzlularla matç sumqayıtlılar üçün mövsümdə ən həlledici qarşılaşma idi. Məhz bu səbəbdən qonaqlar meydanda daha istəkli görünürdü. Oyunun əvvəlində hesabda geri düşməsinə baxmayaraq, 90 dəqiqənin tamamında tablodakı hesab “Sumqayıt”ın istəyinə uyğun oldu.

Zirədə eyniadlı komanda “Neftçi”ni qəbul edirdi. Bu kollektivlər arasında baş tutan əvvəlki 3 görüşdə “ağ-qaralar” “qartallar”a heç bir şans tanımamışdı. Bu dəfə də oyunun başlanğıcı qonaqların tərəfində oldu. Və bunun nəticəsi tabloda əksini tapdı. Kilan Lebonun qolu sayəsində hesabda önə çıxan “ağ-qaralar” ikinci hissədə sürəti bir qədər aşağı salınca, oyuna nəzarət meydan sahiblərinə keзdi. Rəşad Sadıqovun yetirmələri bütün göstəricilərdə “ağ-qaralar”dan üstün görünürdü. Rəqibi davamlı təzyiqdə saxlayan qəsəbə təmsilçisi hesabı bərabərləşdirməyi bacarsa da, qələbə topunu vura bilmədi.

“Sabah” bu tur tarixi nəticəyə imza atdı. “Tələbələr” “Qəbələ”ni evə əliboş yola salmaqla avrokuboklara vəsiqəni təmin etdi. Oyuna yaxşı başlayan meydan sahibləri erkən qola sevinəndə çoxları Murad Musayevin çalışdırdığı kollektivin asan qələbə qazanacağını düşündü. Ancaq matçın gedişində toparlanan “qırmızı-qaralar” “status-kvo”nu bərpa etmək azmış kimi, hesabda da önə çıxmağı bacardı. “Qəbələ”nin futbolçuları, xüsusilə Ülvi İsgəndərov bir qədər dəqiq oynasaydı, qonaqlar meydanı 3 xalla tərk edə bilərdi. Elmar Baxşıyevin yetirmələri real qol şanslarını sağa-sola xərcləyincə, bəxt meydan sahiblərinin üzünə güldü. Əsas vaxtın sonuna az qalmış hesabı bərabərləşdirən “bayquşlar” uzatma dəqiqələrində qələbə qolunu da vura bildi.

Misli premyer-liqası
4-cü dövrə, 28-ci tur
31 mart
Turan Tovuz – Sumqayıt 2:3
1 aprel
Kəpəz- Səbail 1:0
Zirə - Neftçi 1:1
2 aprel
Şamaxı – Qarabağ 0:1
Sabah – Qəbələ 3:2
1. Qarabağ 28 23 5 0 71-15 74
2. Sabah 28 20 5 3 62-20 65
3. Neftçi 28 17 6 5 50-25 57
4. Zirə 28 10 8 10 31-37 38
5. Qəbələ 28 9 9 10 34-35 36
6. Turan Tovuz 28 7 7 14 23-38 28
7. Kəpəz 28 5 10 13 28-49 25
8. Sumqayıt 28 6 6 16 20-52 24
9. Şamaxı 28 4 8 16 23-44 20
10. Səbail 28 4 6 18 20-47 18

Bombardirlər: Musa Qurbanlı (Qarabağ) – 20, Ramil Şeydayev (Qarabağ) – 17, Coy-Lens Mikels (Sabah) – 15, Emin Mahmudov (Neftçi) – 14.

Növbəti turun oyunları: 7 aprel – Qəbələ - Zirə; 8 aprel – Səbail – Sabah, Sumqayıt – Neftçi; 9 aprel – Turan Tovuz – Şamaxı, Qarabağ – Kəpəz.