Həftəsonu keçirilən 18-ci turun oyunları ilə premyer-liqada ilk yarıya yekun vuruldu.


Football-plus.az xəbər verir ki, ikinci dövrənin sonuncu turunda azarkeşlər üç böyükhesablı qələbəyə şahidlik etdi, iki oyunda isə qalib məyyənləşmədi.

Lider “Qarabağ” ilin son oyununda “Səbail”in qonağı idi. İlk yarıda meydan sahibləri “köhlən atlar”ın təzyiqinə tab gətirsə də, fasilədən sonra sürəti bir qədər də artıran qonaqlar sonda istəyinə çatdı. Qurban Qurbanovun komandası autsayderin qapısından 3 cavabsız top keçirməklə istirahətə yüksək əhval-ruhiyyədə yollandı. Onu da qeyd edək ki, ağdamlıların iki qolunu bombardirlik yarışında ilk iki pillədə qərarlaşan Ramil Şeydayevlə Musa Qurbanlı vurdu. Bununla da Ramil qollarının sayını 14-ə, Musa isə 12-yə çatdırdı. “Dənizçilər”in kapitanı Rahid Əmirquliyev üçün də bu matç əlamətdar oldu. Kapitanı olduğu komanda meydanı məyus tərk etsə də, yarımmüdafiəçi premyer-liqada 450-ci oyununa çıxdı. Onu da qeyd edək ki, Əmirquliyev premyer-liqada ən çox oyun keçirən futbolçudu.

“Neftçi” də ili major notda tamamlayır. “Ağ-qaralar” öz meydanında “Şamaxı” ilə üz-üzə gəldi. İkinci dövrədə yalnız “Qarabağ”a uduzan, qalan rəqiblərlə görüşlərdə heç də pis təsir bağışlamayan “şirlər”in tətil ətrəfəsində daha bir sensasiyaya gücü çatmadı. Paytaxt təmsilçisi qonaqları 3 dəfə meydanın mərkəzinə dəvət etdi.

Maraqlı qarşılaşmalardan biri də Sumqayıtda baş tutdu. Şəhərin eyniadlı komandası son oyunlarda “qara zolağ”a düşən “Sabah”ı qonaq etdi. Son 3 turda bir heçə-heçə, iki qələbə qazanmaqla azarkeşləri ümidləndirən “kimyaçılar” bu görüşdə də ən azı 1 xala ümid edirdi. Ancaq cəza səbəbindən oyunu tribunadan izləyən Murad Musayevin komandası “kimyaçılar”ı meydana çıxmağa peşman etdi. “Tələbələr” ilk yarıda 4, fasilədən sonra 2 dəfə fərqləndi. “Qəbələ” - “Turan Tovuz” matçında isə azarkeşlər qol görmədi. Tərəflərin səyinə baxmayaraq, 90 dəqiqə qolsuz başa çatdı.

Turun və ilin son oyunu Zirədə keçirilib. Yerli komanda “Kəpəz”lə üz-üzə gəldi. Oyun meydan sahibləri üçün yaxşı başladı. Rəşad Sadıqovun baş məşqçisi olduğu kollektiv erkən qola sevinib. Lakin 22-ci dəqiqədə artıq “qartallar”ın iki nəfər azlıqda qalması qalan dəqiqələrdə qonaqların hesabda önə çıxması ilə nəticələndi. İkinci yarıda “Kəpəz”in iki futbolçusunu meydandan qovan hakim say baxımından tarazlığı bərpa etdi. Qəsəbə təmsilçisi bundan maksimum yararlanaraq son saniyələrdə bərabərlik qolunu vurdu.

Misli premyer-liqası
2-ci dövrə, 18-ci tur
23 dekabr

Neftçi – Şamaxı 3:0
Sumqayıt – Sabah 0:6

24 dekabr
Qəbələ - Turan Tovuz 0:0
Səbail – Qarabağ 0:3

25 dekabr
Zirə - Kəpəz 2:2
1. Qarabağ 18 16 2 0 48-8 50
2. Sabah 18 13 4 1 40-13 43
3. Neftçi 18 12 2 4 35-19 38
4. Zirə 18 8 4 6 20-24 28
5. Qəbələ 18 7 4 7 20-18 25
6. Turan Tovuz 18 4 5 9 11-22 17
7. Şamaxı 18 2 7 9 14-28 13
8. Sumqayıt 18 2 6 10 10-30 12
9. Kəpəz 18 2 6 10 16-35 12
10. Səbail 18 2 4 12 13-30 10

Bombardirlər: Ramil Şeydayev (Qarabağ) – 14, Musa Qurbanlı (Qarabağ) – 12, Emin Mahmudov (Neftçi) – 10, Coy-Lens Mikels (Sabah) – 9.

Növbəti turun oyunları gələn il yanvarın 24-26-sı aralığında keçiriləcək:

Kəpəz – Qəbələ, Turan Tovuz – Qarabağ, Zirə - Sumqayıt, Şamaxı – Səbail, Sabah – Neftçi.

RƏŞAD