"Trabzonspor" kabus kimi mövsüm keçirməkdə davam edir.

"Football-plus.az" xəbər verir ki, baş məşqçi dəyişikliyinin də hələ ki, bir faydası olmayıb. Komanda xorvatiyalı Nenad Byelitsanın başçılığı altında keçirdiyi 2-ci oyundan da məğlubiyyətlə ayrıldı! Ötən tur Sivas səfərində 1:4 hesablı məğlubiyyət qeydə alınmışdısa, bu dəfə Konya səfərində 1:2 hesablı məğlubiyyət qeydə alındı. Düzdü, hər iki görüşdə trabzonlular azlıqda qalıblar. ''Konyaspor''da çıxış edən yığmamızın üzvü Mahir Emreli dünənki oyunda fasilədə meydana daxil oldu. Düzdü, Mahir qələbə qolunda iştirak etmədi. Amma ötən tur ''Kasımpaşa'' ilə səfər matçında olduğu kimi Konya klubu qələbə qolunu yenə də bizim futbolçu meydana çıxdıqdan sonra vurdu. Yeni rəhbərliyin ayağı hələ ki, ''Trabzonspor''a heç düşərli deyil. Bilindiyi kimi Ahmet Ağaoğlunun istefasından sonra Ərtuğrul Doğan martın 26-da yeni prezident seçilmişdi. Komanda onun dönəmində keçirdiyi 6-cı rəsmi oyunda da qələbəyə həsrət qaldı (5 məğlubiyyət, 1 heç-heçə). Bu, qaradənizlilərin son 5 ildəki ən uğursuz seriyasıdı. Komandanın 2017/18-də 8 oyunluq qələbəsiz seriyası olub. Özü də ''Trabzonspor''un hələ də son çempion statusunda olduğunu xatırladaq. Səfərdə isə ''Qaziantep''lə oyundakı texniki qələbəni saymasaq, ''bordo-mavililər''in çempionat çərçivəsində məğlubiyyət seriyası 7,qələbəsiz seriyası 9 oyuna çatdı!