“Trabzonspor” ötən həftəsonu yeni prezidentini seçdi.

"Football-plus.az" xəbər verir ki, məlum olduğu kimi, son 5 ildə bu vəzifəni icra edən Ahmet Ağaoğlu martın 3-də istefa vermişdi. Bazar günü - martın 26-da klubda növbədənkənar prezident seçkisi baş tutdu. Əslində seçkinin nəticəsi, demək olar, əvvəlcədən məlum idi. Çünki yalnız bir nəfər – Ərtuğrul Doğan başqanlığa namizəd idi. O, seçkiyə qatılan 1500-ə yaxın klub üzvünün yarısından çoxunun səsini qazanaraq “Trabzonspor” tarixinin 18-ci prezidenti oldu!

Qısaca qeyd edək ki, 1977-ci il təvəllüdlü, əslən trabzonlu olan Ərtuğrul Doğan eyni zamanda iş adamıdı. Onun bir neçə daşınmaz əmlak şirkəti var. Amma Doğan daha çox enerji sahəsində fəaldı. 2014-dən bu yana bu sektora atılan “Trabzonspor”un yeni prezidenti ölkənin ən böyük 100 enerji şirkətindən biri olan “Oltan & Köleğlu”nun idarə heyətinin sədridi. Özü də onun şirkəti biokütlə enerjisi ixrac edir. “Oltan & Köleğlu” Çorum, Afyonkarahisar, Samsunda bir çox yerləri biokütlə enerjisi ilə təmin edir. İki uşaq atası olan Doğan 2018-in aprelindən bu yana, yəni əvvəlki başqan Ağaoğlunun dönəmində “Trabzonspor”da prezidentin köməkçisi vəzifəsini icra edirdi.

Bəribaşdan qeyd edək ki, Ərtuğrul Doğan yeni vəzifəsində onu gözləyən problemlərdən birini dərhal yoluna qoyub. Söhbət baş məşqçi məsələsindən gedir. Bilindiyi kimi, Abdulla Avcının martın 7-dəki istefasından sonra qaradənizliləri onun köməkçisi Orhan Ak çalışdırırdı. Komanda onun başçılığı altında hətta “Adana Dəmirspor”u da 4:1 hesabı ilə darmadağın etmişdi. Mətbuatda Fatih Terim, Sərgən Yalçın, Fatih Təkkə və Vinçentso Montella kimi məşçilərin adı hallansa da, yeni rəhbərlik məhz Orhan Akla yola davam etmək qərarına gəlib. Çox güman, 43 yaşlı mütəxəssis mövsümün sonuna qədər bu vəzifəni icra edəcək. Amma “Trabzonspor” camiəsinin nə dərəcədə səbirsiz olduğunu nəzərə alsaq, Akın mövsümün sonuna qədər bu vəzifədə qalacağına heç kim zəmanət verə bilməz.

Doğanın həll etməli olduğu daha bir önəmli məqam borclardı. Bugünlərdə məlum olmuşdu ki, klubun indiki və sabiq futbolçularından onunun meneceri pulunu ala bilmədiyinə görə “bordo-mavililər”i məhkəməyə verib. Başqa sözlə desək, “Trabzonspor” ayın sonuna qədər ümumilikdə 16 milyon avro ödəməlidi! Yerli mənbələr bir neçə gün öncə iddia edirdilər ki, Doğan bu məbləğin yalnız 9 milyon avrosunu toplayıb. Borclar vaxtında ödənilməsə qaradənizlilər hətta avrokuboklardan da kənarlaşdırıla bilər. Yeni rəhbərlik “altyapı”da da ciddi islahatlar həyata keçirmək niyyətindədi. Bu baxımdan ötən il işbirliyi qurulan Belçikanın “Double Pass” şirkətinin araya-ərsəyə gətirdiyi model əsas götürüləcək.