Mövsüm sona yaxınlaşdıqca ''Trabzonspor''un durumu daha da qəlizləşir. Halbuki yeni seçilən rəhbərlik cümə axşamı baş tutan ''Sivasspor''la oyuna dönüş anı kimi baxırdı. Çünki komanda yeni baş məşqçi Nenad Byelitsanın başçılığı altında ilk oyununa çıxırdı.

"Football-plus.az" xəbər verir ki, son çempion erkən qolla hesabı açsa da, davamı gəlmədi. 22-ci dəqiqədən etibarən azlıqda oynayan ''Trabzonspor'' qalan vaxtda 4 top buraxaraq darmadağın oldu (1:4)! Bu, qaradənizlilərin son 8 rəsmi oyunda 6-cı məğlubiyyəti oldu.

Komanda 29 oyuna cəmi 45 xal toplayaraq 6-cı pillədə qərarlaşıb. Halbuki ötən mövsüm Abdulla Avcı ilə ''bordo-mavililər'' 29 tura 70 xal toplaşmışdılar! Texniki qələbəni saymasaq, komandanın səfərdə məğlubiyyət seriyası 6 (!), qələbəsiz seriyası 8 oyuna çatdı. Rəqib meydanında son qələbə 200 gün öncə - oktyabrın 1-də ''Kayserispor''la oyunda əldə olunub. ''Trabzonspor'' bu mövsüm superliqada artıq 5-ci dəfə bir oyuna ən azı 4 top buraxaraq öz antirekordunu tekrarladı.

Bu, daha öncə yalnız 2001/02-də baş vermişdi. Yeri gəlmişkən, onu da bildirək ki, xorvatiyalı Byelitsa ''Trabzonspor'' tarixində ilk superliqa matçında 4 qol buraxan birinci əcnəbi məşqçi oldu!