A seriyasının 31-ci turundan sonra “Napoli”ni çoxdan gözlənilən çempionluğa aparan yol bir qədər də qısaldı. Lider növbəti vacib qələbə ilə azarkeşlərinin ümidlərini daha da artırdı.

"Football-plus.az" xəbər verir ki, həftəiçi Çempionlar Liqasının (ÇL) cavab oyununda “Milan”la heç-heçə etməklə (1:1) bu turnirdə mübarizəni dayandıran “Napoli”nin Turindəki işinin asan olmayacağı aydın idi. Prinsipial matçdan əvvəl “Yuventus”un düşərgəsində əhval-ruhiyyə əla idi. Belə ki, Turin klubunun İtaliya Milli Olimpiya Komitəsinə ünvanladığı şikayəti müsbət cavablanmış və İtaliya Futbol Federasiyasının Apellyasiya Məhkəməsinin yanvarın 20-də komandanın hesabından çıxdığı 15 xal geri qaytarılmışdı. Nəticədə A seriyasında 7-ci yerdən 3-ə yüksələn “Yuventus”un “Napoli”dən ilk dövrədəki 1:5 hesablı məğlubiyyətin əvəzini çıxmağa yönələn motivasiyası daha da artmışdı. Amma turinlilərin gücü liderdən bir xal belə almağa çatmadı. Əslində əvvəldən axıra qədər gərgin mübarizə şəraitində keçən matç qolsuz “sülh”lə nəticələnməyə çox yaxın idi. Lakin son dəqiqələrdə Raspadorinin vurduğu qol neapolluları skudettoya bir qədər də yaxınlaşdırdı.

Luçano Spallettinin komandasınn əsas izləyicisi “Latsio” evdə “Torino”ya uduzdu (0:1). Buna baxmayaraq, “qartallar” 2-ci yerdəki mövqeyini itirmədilər. Romanın eyniadlı digər təmsilçisi də turu xalsız başa vurdu. “Atalanta”ya məğlubiyyət (1:3) “canavarlar”a ÇL-ə vəsiqə verən 4-cü yeri itirmək bahasına başa gəldi.

Paytaxt komandalarının büdrəməsi milanlıların işinə yaradı. Şəhərin eyniadlı komandası “Leççe” üzərində qələbə (2:0) ilə 4-cü yerə yüksəldi. Son çempion “Milan” turnir cədvəlində “Roma”nı daha çox qol vurduğu üçün üstələyir. Milanın digər klubu da azarkeşlərini sevindirdi. Son mövsümün vitse-çempionu “İnter” Empolidə eyniadlı rəqibə 3:0 hesabıyla qalib gələrək “ÇL zonası”na yaxınlaşdı.

Turun rəqəmi
17 – mövsümün sonuna 7 tur qalmış liderlə əsas izləyicisi arasındakı xal fərqi bu rəqəmə bərabərdi. “Napoli” növbəti turda qalib gələcəyi və “Latsio” xal itirəcəyi halda neapolluların gözlənilən çempionluğu rəsmiləşəcək.

Turun ulduzu
Romelu Lukaku (İnter) - belçikalı futbolçu komandasının “Empoli”dən maksimum xal almasında iki qol və bir məhsuldar ötürmə ilə rol oynadı. Başqa sözlə, hər üç qolda yaxından iştirak etdi.