Oyun Bakıda keçirilsə də, bəlkə də Tovuzdan gələn azarkeşlərin sayı daha çox idi. Hər halda, bu amil "Neftçi"nin oyuna istəkli başlamasına mane olmadı. Ayxan Abbasovun komandası ilk dəqiqələrdən müdafiəyəmeyilli oyun sərgiləyirdi.

Lakin arxa xətt oyunçularında həyəcan hiss olunurdu. Bu da "ağ-qaralar"ın rahat oynamasına şərait yaradırdı ki, nəticədə ilk hücum qolla nəticələndi. Caber Kamalı məyus etsə də, VAR-ın müdaxiləsindən sonra Fərid Hacıyev qolu ləğv etdi. Ümumiyyətlə, ilk 30 dəqiqənin tamamına kimi topa nəzarət bakılılarda idi. Düzdü, ara-sıra Runi və Beladji "Neftçi"nin müdafiəçilərini narahat edirdi. Zaman isə "ağ-qaralar"ın əleyhinə işləyirdi. Üstəlik "Neftçi"nin futbolçuları qapı istiqamətinə dəqiq zərbə vura bilmirdi.

34-cü dəqiqədə flaqman qola yaxın oldu. Kenninin künc nöqtəsindən ötürməsini Saldanya qapıya göndərə bilmədi. Bir dəqiqə sonra isə qonaqlar təhlükəli vəziyyət yaratdı. Marandiçi iki rəqibi keçərək Xəyala ötürmə verdi. Yarımmüdafiəçinin qapı istiqamətində asmasına Faiq başla toxunsa da, müdafiəçilər topu uzaqlaşdırdı. İlk hissənin sonlarında Şəhriyar toqquşma nəticəsində huşunu itirərək yerdə qaldı. Həkimlər dərhal müdaxilə edərək onu özünə gətirdi. "Neftçi"nin hücumundan sonra müdafiəçi yenə özünü yerə atdı. Qonaqlar topu auta göndərsə də, Sayef "dəri kürə"ni onlara qaytarmaq istəmədi…

Komandalar 2-ci hissəyə dəyişiklik etmədən başladı. Fasilədən sonra da ssenari dəyişmədi. "Neftçi" hücum edir, "Turan Tovuz" isə müdafiə olunurdu. Qonaqlar bəzi məqamlarda topu özündə saxlayaraq meydan sahiblərinin arxa xəttinin səhvini gözləyirdi. Bu minvalla daha 15 dəqiqə geridə qaldı. Bir qədər sonra isə qonaqlar real fürsət yaxaladı. Amma Xəyalın ötürməsini Beladji dəqiq zərbə ilə tamamlaya bilmədi. Dəiqələr irəlilədikcə "ağ-qaralar" hücumların kəsərini artırdı. Flaqman iki epizodda qola yaxınlaşdı. 70-ci dəqiqədə Sayefin zərbəsi tirdən qayıtdı. 76-cı dəqiqədə isə künc zərbəsindən sonra Sezar tiri nişan aldı. Nəhayət, "Neftçi" qol vurdu. Ömərin ötürməsi zamanı müdafiəçidən səkən top tora daxil oldu. Lakin yenə VAR müdaxilə etdi. Əliyar Ağayev hücum zamanı Marandiçiyə qarşı qaydanın pozulduğunu bildirdi ki, Fərid Hacıyev də epizodu izlədikdən sonra qolu ləğv etdi.

Oyunun son dəqiqələri olduqca gərgin keçdi. "Turan Tovuz" bütün komanda ilə müdafiə olunurdu. Lakin 3-cü uzatma dəqiqəsində Mahmudov komandasını məğlubiyyətdən xilas etdi. Kapitan cərimə zərbəsindən hesabı açdı. Bundan sonra da flaqman hücumlarını davam etdirdi və arzuladığı qolu vurdu. Yeqorun ötürməsini Kenni boş qapıdan keçirdi. Beləliklə, flaqman ölüm-qalım mübarizəsində "Turan Tovuz"u 2:0 hesabıyla məğlub edərək tarixində 11-ci dəfə adını filana yazdırdı. Bakılılar əvvəlki 10 finalın 6-da qalib gəlib, 4-də uduzub.

Maraqlıdı…
* 18-ci dəqiqədə Sayefin qarşısını Xəyal “sürüşmə” fəndi ilə aldı. Top Lebona düşərkən isə yan xətt hakimi Rəhman İmami bayrağını qaldırdı. Regekampf buna olduqca əsəbləşdi. O, topun rəqibdən getdiyini 4-cü hakim İnqilab Məmmədova izah etməyə çalışsa da, bunun faydası olmadı.
* 26-cı dəqiqədə "Turan Tovuz" azarkeşləri Ayxan Abbasovun adını səsləyərək, ona dəstək nümayiş etdirdi.
* Şəhriyar Əliyev huşunu itirdikdən sonra özünə gəlib meydana qayıdarkən Aqil Məmmədov onun durumu ilə maraqlandı.
* Fərid Hacıyev ilk hissəyə 4 dəqiqə əlavə etdi. Lakin VAR-ın müdaxiləsinə 3, Şəhriyar Əliyev yerdə qalarkən azı 5 dəqiqə getdi. Baş hakim ilk hissəyə ən azı 5-6 dəqiqə əlavə etməliydi.
* Yeqor Solomonu əvəzləyərkən 4-cü hakim tablonu tərs tutmuşdu.
* "Neftçi" hesabı açarkən klubun tərcüməçisi Vüqar Əliyev qonaqların ehtiyat oyunçularına əl hərəkəti edərək "indi vaxt aparın", - deyə səsləndi. Fərid Hacıyev buna görə onu qırmızı vərəqə ilə cəzalandırdı.