“Neftçi” nəinki bu matçın, ümumiyyətlə, cütün favoriti göstərilsə də, Tovuzda ortaya qoyduğu oyunla statusunu doğrultmadı.

Regekampfın çalışdırdığı komandanın ilk dəqiqələrdən irəli atılacağı gözlənilirdi. Amma tam əksi yaşandı. Meydan sahibləri ilk dəqiqələrdən daha istəkli görünməklə yanaşı, oyun üstünlüyünə də yiyələndi. Ümumilikdə meydanda gərgin taltiki savaş gedirdi. Bu üzdən qapılar önündə o qədər də çox təhlükəli vəziyyət yaşanmırdı. Qonaqların ilk ciddi, yaddaqalan hücumu 20-ci dəqiqəyə təsadüf etdi. Emin cərimə meydançasında bir qədər ləng davranmasaydı, qapıçı ilə üzbəüz qala bilərdi. “Neftçi”nin kapitanı “fərdi yaradıcılığa” aludə olduğundan, əlverişli imkanı boşa verdi. Meydan sahibləri isə 44-cü dəqiqədə ilk ilk real qol şansı qazandı. Brkiç əvvəlcə Natanın yaxın məsafədən zərbəsini ayaqları ilə uzaqlaşdırdı. Sonra isə Marandiçi cərimə meydançasına daxil olub “çərçivə”ni nişan alsa da, top qapının üstündən keçdi. İlk yarının son dəqiqələrində Lebonun zərbəsindən sonra top Siyandanın əlinə dəyincə, baş hakim düşünmədən “nöqtə”ni göstərdi. Lakin VAR-dan gələn siqnaldan sonra monitora yaxınlaşan referi tovuzlu azarkeşləri sevincə qərq edərək qayda pozuntusunun olmadığını bildirdi.

Fasilədən sonra da azarkeşlər meydanda bərabərsəviyyəli oyuna şahidlik etsə də, “boz qurdlar” bir qol vurmaqla tovuzluları çılğına döndərdi. Marandiçi Pusinin qapıya paralel ötürməsini dəqiq tamamladı. Tərəflərin qalan dəqiqələr ərzində fərqlənmək cəhdləri fayda vermədi. Nəticədə “Turan Tovuz” aprelin 26-da Bakıda keçiriləcək cavab görüşünə nisbətən rahat çıxacaq.

Maraqlıdı…
* Hakimin start fitindən təxminən saatyarım əvvəl “Turan Tovuz”un sponsoru “Huner Group”un rəhbəri Ehtiram Quliyevin komandanın baş məşqçisi Ayxan Abbasov və klubun icraçı direktoru Nadir Nəbiyevlə bir tərəfə çəkilib uzun müddət söhbət etməsi gözümüzdən yayınmadı.
* Stadiona gələn hər bir tovuzlu azarkeşə üzərində klubun loqosu olan kiçik bayraq təqdim olunurdu.
* Tovuz stadionu ölkədə bəlkə də yeganə arenadı ki, diktor hər oyundan öncə rəqib komandanın azarkeşlərini xüsusi salamlayır. Bu dəfə də istisna olmadı.
* AFFA-nın baş katibi Sərxan Hacıyev də matçı izləmək üçün Qəbələdən sonra Tovuza təşrif buyurmuşdu.
* Vaxtilə “Sumqayıt”da Ayxan Abbasovun rəhbərliyi altında çıxış edən Höccət Haqverdi oyundan əvvəl təxminən 30 metr qaçaraq texniki zonaya yaxınlaşdı və sabiq baş məşqçisi ilə çox isti görüşdü. “Neftçi”nin müdafiəçisi Elnur Çodarovu da yaddan çıxarmadı.

RƏŞAD