Dumanı da nəzərə alsaq, İngiltərə premyer-liqasının hansısa oyununu izlədiyimizi söyləyə bilərdik.

Həm hava şəraiti, həm də oyunun sürəti bu fikri səsləndirməyə əsas verir. “Qarabağ”ın meydana, demək olar ki, ikinci heyətlə çıxması “Neftçi”nin qələbə qazanacağını düşünməyə imkan verirdi. Oyuna da flaqman istəkli başladı. Düzdü, ağdamlıların hücum xəttində yer alan futbolçular tez-tez “Neftçi”nin müdafiə xəttini narahat edirdi. Lakin flaqmanın üzvlərinin anlaşması “Qarabağ”la müqayisədə daha yaxşı idi. Bakılıların qol axtarışı 33-cü dəqiqədə nəticə verdi. Caberin açar ötürməsindən sonra Lebon bir qədər irəliləyərək topu qapının küncünə göndərdi. Qoldan sonra da “Neftçi” üstün oyun sərgilədi. Lakin hücum xəttində yer alan futbolçuların qeyri-dəqiqliyi fərqin artmasına imkan vermədi.

Fasilədən sonra isə “Qarabağ”ın ağır artilleriyası oyuna qoşuldu. Qurban Qurbanov Almeyda, Zubir və Veşoviçi meydana buraxmaqla oyunda dönüş yaratdı. Bakılılar artıq ilk hissədəki kimi kəsərli hücumlar qura bilmirdi. Ramillə Julio meydana çıxandan sonra isə ağdamlılar “Neftçi”nin cərimə meydanına axın etməyə başladı. Bu da özünü 83-cü dəqiqədə göstərdi. Veşoviçin cərimə meydanına ötürməsindən sonra Höccətə dəyən top tora daxil oldu.

Bundan sonra meydanda qalmaqal yaşansa da, Rəşad Əhmədov hadisələrin böyüməsinə imkan vermədi. Ümumiyyətlə, oyunun maraqlı keçməsinin səbəbkarlarından biri də referi idi. O, görüşü ideala yaxın idarə etdi. Matç 1:1 hesabı ilə bitdi, Regekampfın ideal formada olan komandası yarımcan “Qarabağ”ı məğlub edə bilmədi.

Gözdən qaçmadı:
* “İmarət”in üzvləri görüş başlamamış qara, göy, ağ rəngli bayraqlar açmışdılar.
* “Neftçi” hesabı açarkən Qurban Qurbanov 4-cü hakim Rəvan Həmzəzadəyə ofsayd olduğunu söylədi. Lakin hakim epizodun VAR tərəfindən incələndiyini bildirdi.
* İlk hissənin sonlarında, demək olar ki, sıx duman üzündən oyunu izləmək mümkün deyildi. Hətta “CBC Sport”un şərhçisi Elnur Məmmədli oyun zamanı “top hardadı bilinmir”, “kimsə yıxıldı”, - deyə fikirlər səsləndirirdi.
* Ataa Caber zədələnərkən Emin Mahmudov onun ayağının qırıldığını dərhal anladı. Kapitan tez qışqıraraq həkimlərin meydana girməsini istədi. Həmin an “Neftçi”nin vingeri Lebon hadisədən şoka düşmüş adam təsiri bağışlayırdı.
* Bərabərlik qolundan sonra Brkiçlə “Qarabağ” futbolçuları arasında problem yaşandı. Rəşad Əhmədovun müdaxiləsindən sonra oyunçular arasında gərginlik sakitləşdi.
* “Qarabağ” qol vurandan sonra “Neftçi” azarkeşləri partlayıcı maddələri meydana atdılar. Quqeşaşvili isə petardı götürüb “Neftçi” azarkeşləri tərəfindən asılmış bayrağa doğru tulladı. Bu zaman flaqman fanatları tribunadan aşağı enməyə çalışsalar da, polis onlara mane oldu.
* Qurban Qurbanov oyun bərpa olunan kimi Lukanın üstənə çığırdı. O, əli ilə “başın xarabdı?” işarəsini göstərərək qolkiperə əsəbləşdi.
* Oyun bitən kimi Regekampf Azər Salahlının saxlayıb tənbəh etdi.

İLKİN SULTANLI