Ötən turda “Səbail” qələbə qazanmış, “Neftçi” isə xal itirmişdi.
Bu səbəbdən də derbinin maraqlı olacağı gözlənilirdi. Lakin flaqman ilk dəqiqələrdən təşəbbüsü ələ alaraq hesabı açdı. Kenninin künc nöqtəsindən ötürməsindən sonra top Elmirin əlinə dəydi. Hakim əvvəlcə bunu görməsə də, VAR-dan gələn xəbərdarlıqdan sonra 11 metrlik cərimə zərbəsi təyin etdi. Topun başına keçən israilli hesabı açdı. Qoldan sonra “dənizçilər” irəli atıldı. Zakpa ilə Samirin fəallığı diqqəti çəkirdi. Şahin Diniyevin komandasının rəqibdən çəkinmədiyi görünürdü. Hissənin sonlarına doğru “Səbail”in bu fəallığı azaldı. “Neftçi” tədricən üstünlüyü ələ aldı. Lakin hər iki komanda fasiləyə kimi fərqlənə bilmədi.
İkinci hissə başlayan kimi “Neftçi” yenə qol vurdu. Azərə qarşı cərimə meydançasında kobudluq oldu. Bu səbəbdən Kamranbəy Rəhimov yenə “nöqtə”ni göstərdi. Bu dəfə Emin fərqlənərək fərqi artırdı. İkinci hissədə də “Səbail” qol vurmağa çalışırdı. Lakin “dənizçilər” ələ düşən fürsətləri sağa-sola xərcləyirdi. “Neftçi” isə hücumların birindən yararlandı. 74-cü dəqiqədə Sayefin ötürməsindən sonra Saldanya başla Emili məyus edərək yekun nəticəni müəyyənləşdirdi. Beləliklə, derbidə flaqman 3:0 hesablı rahat qələbə qazandı.
Gözdən qaçmadı
* Futbolçular meydana çıxarkən stadionun suvarma sistemi işləyirdi.
* “Neftçi”nin ilk penaltisini Kenni Sayef yerinə yetirdi. Bu məqam Laurentsiu Regekampfı təəccübləndirdi. Çünki komandanın ştatlı penalty vuranı Emin Mahmudovdu.
* İkinci hissə bir qədər gec başladı. “Neftçi”nin futbolçuları meydanda olsa da, “Səbail”in üzvləri və hakimlər bir müddət yubandı. Sonradan aydın oldu ki, “dənizçilər” paltardəyişmə otağının qapısını aça bilmirmiş…
* “Neftçi”nin azarkeşləri rəqibin hücumçusu Mirabdulla Abbasovla bağlı iki fərqli şüarlar səsləndirdi: “Miri, qəlyana!”, “Neftçi”ni satan yubka geyinsin!”
* Matç bitəndən sonra “Dənizçilər” fanklubunun səsləndirdiyi şüar olduqca maraqlı idi: “Canınız sağ olsun, əsas kubokdu”.
İLKİN SULTANLI